Халык "шыпырт" кына туйлар үткәрә: "Конкурслар онытыла башлаган"

Шулай ук Илсур һәм Гөлназ Шәрипҗановлар да Сабада никах мәҗлесе үткәреп кайтты.

Пародия остасы, алып баручы Алсу Фарукшина да ниһаять җәйге туйлар сезонын ачып җибәргән. Туй соңгы мода буенча кафеда яисә ресторанда түгел, ә өйдә үткән. Элеккеге заманнардагы кебек. Менә бит, пандемиянең яхшы яклары да бар, гореф-гадәтләрне кайтарырга ярдәм итә!

-Туй уздырачаклары хакында атна башында гына билгеле булды. Узган атнада яшьләр никах укыткан иде. Энеләре армиягә китә, шуңа туйны да тизрәк үткәрәселәре  килде. Күп кеше җыймыйча, үзләренең гаиләләре, авыл кешеләре белән бергә, бәйрәмнәрен үткәрергә булдылар. ЗАГСка ун гына кеше кергән, битлек, пирчәткәләр белән. Фотога да хәтта шулай төшкәннәр.

Озак вакыт эшләми торганнан соң кире эшкә чыгу авыр булды, димәс идем. Әмма кайбер конкурслар онытыла башлаган. Туй өйдә үтсә дә, форматын үзгәртмәскә тырыштык. Өйдә конкурсларны бик үткәреп булмый, шуңа рәхәтләнеп урамда уйнаттык, өй алдында биедек. Шундый рәхәт, күңелле, бик җиңел үтте. Арыганнары кереп ята да ала. Алла бирсә, әкренләп шулай эшкә кереп китәрбез, дип өметләнәм, - диде Алсу Фарукшина.

Сүз уңаеннан, Алсу мәҗлесләр уздырган өчен быел бәяләрне арттырмаячак. “Мин эшемне бик яратам һәм кешеләрнең дә хәзер нинди икътисади хәлдә икәнен яхшы аңлыйм”, диде ул.