“Мин матурлык эзләп йөрим җирдән...”

Кичә 2021 елның 5 сентябрендә 15:00дә Кариев исемендәге театр бинасында уздырылачак. 2 сәгать бара торган әлеге чарада хәзерге заман шагыйрьләренең, ягъни Ренат Галиәскәр, Эльмира Җәлилова, Халисә Ширмән, Әнгам Атнабаев, Фәнис Яруллин шигырьләре укылачак һәм “Мингазов” каверлар җырлаучы төркем тарафыннан хитка әйләнгән татар җырлары яңгыраячак. Шигырьләрне “Китап” радиосының башкарма продюсеры, әлеге проектны уйлап табучы Лилия Кадырова укыячак.

“Музыкаль-әдәби кичәдә барыбызга да таныш җырлар булачак, һәм “Китап” радиосында яңгыраган шигырьләрне халыкка җиткерәчәкмен,” - ди Лилия. Әлеге кичә “Китап” радиосының тәүге проекты. Керү түләүсез, әмма теркәлү узарга кирәк иде. Ни өчен “иде” дим, чөнки бу тамашаны карарга теләүчеләр күп булып чыккан һәм урыннар бетеп тә куйган. Киләчәктә бәлки тагын кабатланыр, шуңа карый алмаучылар кәефегезне төшермәгез.

“Китап” радиосы баш мөхәррире Алмаз Миргаязов сүзләренчә, кичә бер сулышта, тулы бер җыр кебек узачак. Оештыручылар барлык серләрне дә ачып бетермәделәр, ләкин килүчеләр тәэсирләнеп кайтып китәчәкләр дип ышандырдылар.