«Энекәш»: күз яшьләре белән язылган китап

Кыска вакытлы ялга кайткан чакларында бергәләп сөендек, яраланганын ишеткәч, бергәләп сызландык. Тыныч тормышта яшәргә, мәктәптә балалар укытырга тиеш “Физик”ның һәлак булуын ишетеп яшьләр түктек. Олы яшьтәге әти-әнисе, туганнарына сабырлык теләдек. 

Үзебезнең егетләрнең (алар арасында аның энесе дә бар) Ватанны сакларга әзер булулары, куркып качып ятмаулары Гөлүсә Закированы беренче көннән илһамландырды. Ул бу темага башта хикәяләр язды. “Сөембикә”дә басылып чыккан “Бияләй” дигәнен укыдым, күңелләрне айкады - җаннан чыккан гына җанга барып җитә шул. 

Ә бүген әдәби кафеда Гөлүсә Закированың “Энекәш” дигән китабын тәкъдир итү булды. Китап чыгу автор өчен дә, аның иҗатын яратучы укучы өчен дә бәйрәм булса да, бу юлы алай булмады. “Кайткач, бергә укырбыз, - дип яза башлаган китапның төп герое батырларча һәлак булды. Гадәттә, автор баш героен теләсә үтерә, теләсә исән калдыра ала. Ә бу юлы автор язмыш язганга буйсына, берни дә эшли алмый. Шунысы аяныч аның, шунысы фаҗига. Күз яшьләре белән һәр битен сугарып, сүзләрен җаныннан суырып алып язган аны каләмдәшебез. Нинди хисләр кичергәнен үзе генә белгәндер. Бик авыр газаплы хезмәт башкарган. Каләмдәшебез, сокланып баш иярлек.  

Бу әле махсус хәрби операция турында татар телендә беренче әсәр, беренче китап. Авторны зур уңышы белән котларга Татарстан Республикасы Журналистлар берлеге рәисе Илшат Әминов, «Татмедиа» җитәкчесе Шамил Садыйков та килгән иде.

Китапта бер сюжет линиясе «Казансу» газетасы корреспонденты Алия Ганиева белән бәйле. Ул авылларга күп йөри, гуманитар ярдәм әзерләүчеләрне дә, геройларның әти-әниләре белән дә күп аралашкан кеше. Аның җыелма образы аша журналистларның намуслы хезмәте күтәрелә. Әсәрдә сурәтләнгән  журналист образы ул безнең коллегабыз - «Шәһри Казан» журналисты Лилия Гайнуллина. Махсус хәрби операция башланганнан бирле газетабызда «Каһарманлык» рубрикасын алып бара. Яу кырында һәлак булган егетләребез турындагы язмалары кулдан-кулга йөреп укыла. 

“Казан утлары” редакциясе мондый кесә китапларның 28сен нәшер иткән. Аларның һәрберсе әдәби кафеда тәкъдим ителеп килде. Ләкин берсендә дә моның кадәр кеше күргән булмады. Бүген килгән халык алар барысы да китапның булачак укчылары бит, әдәби кафега гына сыешмады. Бу аңлашыла да, чөнки  китап эчендә җаны булган бөтен кешенең кан саркып торган ярасы, әрнүе хакында. Аны укыганда бик күпләрнең йөрәкләре  кысылыр әле. “Монысын тизрәк тәмамларга, шундый һәлакәтләргә юл куймаска иде!”  дигән изге теләк яшен шикелле яндырып, җаннарын өтәр.