Көн саен 5000 адым җәяү йөрергә кирәк

Нина Жегаловага – 70 яшь. Ул марафонга тамашачы буларак килгән, шулай да чарага кадәр дүрт чакрым йөреп кайтырга өлгергән инде. Скандинавия йөрешеннән тыш, Нина ханым латин-америка биюләрен өйрәнә, немец телен үзләштерә, чаңгыда йөри, җәй көне велосипедта җилдерә. Әле тагын салкын суда коена, йөзә.

– Атта да йөргәнем булды, белгечлегем буенча музыка җитәкчесе идем,әле былтыр гына эштән туктадым. Актив яшәргә тырышам, махсус диеталар тотмыйм, ашыйсым килгәнне ашыйм, ә менә күнегүләрне онытмыйм. Хәрәкәттә – бәрәкәт, – ди Ни­на ханым.

Ул канындагы шикәр, холестерин кү­ләмен дә даими тикшертеп тора. Скандинавия йөреше белән шөгыльләнә башлаганына – ике ел. Беренче нәтиҗәләрне сизгән – кан басымы нормальләшкән.

 Марафон алдыннан сөякләрен яздыру өчен төрле күнегүләр башкаручы 67 яшьлек Юрий Петров белән дә сөйләштек. Ул гомер буе чаңгыда йөргән. Хәзер скандинавия йөреше белән дә кызыксына башлаган.
– Телевизор каршында утырганчы, шул вакытны сәламәтлекне ныгытуга сарыф итсәң, күпкә файдалырак. Мин Юдино бис­тәсендә яшим, якында гына урман, көн саен саф һавада йөрим,спорт пульсны нормада тотарга ярдәм итә, – ди Петр абзый.

Әлеге марафонны «Зәңгәр тасма» инсульт белән көрәш фонды оештырган. Төрле дистанцияләрне узудан тыш, катнашучыларга инсультны кисәтүгә кагылышлы сорау­лар да бирделәр, дөрес җавап бирүчеләргә түштамгалар бүләк иттеләр.

 – Инсультны кисәтү, авыруның билгеләре турында Төбәкара клиник-диагностика үзәге табиблары лекцияләр укыйлар, республиканың төрле районнарында да кисәтү эшләре алып барабыз. Ә менә мондый зур масштабтагы чараны беренче тапкыр оештырдык. Кешеләрдә ул зур кызыксыну уятты. Авыруны кисәтү турында бүген 50 кеше беләчәк, алар кайтып туганнарына, якыннарына сөйләрләр, сәламәтлекне кайгыртырга кирәк», – ди «Зәңгәр тасма» фондының башкаручы директоры табиб Гүзәл Старостина.

Адел Галимҗанов, Төбәкара клиник-диагностика үзәге генераль директорының урынбасары:

– Гади итеп аңлатасым килә. Яшьләр елмаялар, тормышка шатланалар, куллар, аяклар хәрәкәтләнә. Ә хәзер бер минутка гына мондый күренешне күз алдына китерегез: кул, аяк сезгә буйсынмый, хәтта йомышны үтәр өчен дә урын өстеннән торып булмый, газап, инвалидлык. Вакытны кире кайтарып булса, кисәтү чаралары да күрелер иде: дөрес туклану, актив тормыш, чаңгыда йөрү, скандинавия йөреше белән шөгыльләнү... Сәламәт яшәү рәвеше алып барсагыз, инсультны урап узу өмете зур.

Эльвира Мозаффар