«Кан басымым нормада. Даруны эчүне дәвам итәргәме?» Табиб аңлата

Бу сорауны мин көн саен диярлек ишетәм, ди терапевт-кардиолог, медицина фәннәре кандидаты Ленар Кашапов. Табиб гади тел белән моңа аңлатма бирә.

Иң мөһиме: дару эчкән чакта кан басымының нормаль булуы — авырудан котылдым дигән сүз түгел. Киресенчә, бу — даруның үз вазифасын дөрес үтәвен күрсәтә, ди Ленар Кашапов. Һәм бик гади мисал китерә:

Күз алдыгызга китерегез: корылык вакытында бакчага су сибәсез ди. Җиргә су сибеп торганга, ул дымлы. Су сибүне туктатсагыз, җир яңадан кибә башлый. Кан басымы белән дә шулай: препарат аны куркынычсыз дәрәҗәдә тотып тора. Дару эчүне туктатсагыз, кан басымы яңадан күтәрелергә мөмкин. Кайбер очракларда аның элеккегә караганда да югарырак менүе ихтимал.

Ә дару эчүне дәвам итсәң, кан басымы артык төшеп китмәсме?

Дөрес сайланган препаратның чиксез җыелып бару нәтиҗәсе юк. Ул организмда көннән-көн артып, кан басымын һаман түбәнәйтә бармый. Даруның дозасы кан басымын тиешле дәрәҗәдә тотарлык итеп сайлана, дип аңлата белгеч. Әгәр бүген басым 120/80 булса, иртәгә дә, шул ук дозаны кабул иткәндә, шуңа якын күрсәткеч булачак. Ләкин кайбер очракларда кан басымы, чыннан да, гадәттәгедән түбәнрәк төшәргә мөмкин.

Моңа түбәндәгеләр сәбәп булырга мөмкин:

· даруны артык күп кабул итү яки дозаны үзлектән арттыру;

· организмның сусызлануы — эссе һава, каты тирләү, эч китү, косу, сыеклыкны аз куллану;

· тозсыз диета яки организмда электролитларның кимүе;

· башка дарулар өстәлүе, шул исәптән авыртуны баса торган препаратлар, антидепрессантлар, бәвел кудыргычлар;

· бөер авыруларының кискенләшүе, анемия, кан китү;

· өлкән яшьтә кан басымын көйләү механизмының зәгыйфьләнүе;

· артык ябыгу, йокы апноэсын дәвалау, стрессның кимүе.

Димәк, проблема даруның организмда «җыелып баруында» түгел, ә организмдагы шартларның үзгәрүендә булырга мөмкин.

Мондый очракта дару дозасын, чыннан да, үзгәртергә кирәк булырга мөмкин. Әмма моны пациент үзе түгел, ә табиб хәл итә.

Даруны үз белдегең белән кинәт туктату ни өчен куркыныч?

Аеруча бета-блокаторларны (бисопролол, метопролол) һәм клонидинны кинәт туктатырга ярамый, дип кисәтә Ленар Кашапов.