"Күп сөйләшмәсә дә, Робертны әбиләр дә, бәбиләр дә ярата иде..."

Мемориаль такта ачылу тантанасы болытлы, суык көнгә туры килсә дә, чарага килүчеләрнең күплеге, кешеләрнең елмаюы күңелне җылытып торды. Әлеге шатлыклы вакыйгада Татарстан Республикасы Дәүләт Киңәшчесе, Татарстанның Беренче Президенты Минтимер Шәрип улы Шәймиевның да катнашуы ямь өстенә ямь бирде. Аның вакыт табып килүе Роберт Миңнуллинга карата олы хөрмәте, шагыйрьнең абруе турында сөйли. 

Миңа бу чарага чакыру килгәч, язу белән яхшылап танышып чыгарга өлгергәнче, уйлап куйдым: мемориаль такта ачыламы, әллә һәйкәлме? Истәлек тактасы куелу да зур сөенеч, әлбәттә, әмма олы шагыйребез һәйкәлгә дә лаектыр, дип уйлыйм. Якын киләчәктә аны да күрергә насыйп булсын иде. 

Беренче Президентыбыз килә-килешкә үк чарага җыелган кешеләргә рәхмәт әйтте. Киресенчә булырга тиеш кебек, югыйсә. Чыгыш ясаганда тагын бер тапкыр халыкка рәхмәтләрен җиткерде. 

“Роберт Миңнуллин кешеләргә шулчаклы мәрхәмәтле булды, аның шигырьләре йөрәгеннән чыга иде. Әйтергә кирәк, безнең халкыбыз ярата торган шагыйрьләребез, язучыларыбыз күп. Роберт Миңнуллин аларның иң талантлыларының берсе иде. 
Әгәр аның тормыш юлын карасак, Республикабыз әдәбият дөньясында ул алмаган бер генә премия дә калмады. Менә Робертыбыз шушындый!” – диде Минтимер Шәймиев. Ул шулай ук атаклы шагыйребезгә багышлап үзе иҗат иткән шигырьне дә укып күрсәтте: 
“Әдәпле, зур йөрәкле
Тыйнак, тирән фикерле.
Шундый шагыйрь Роберт
Безгә үрнәк түгелме?

Татар, башкорт халкына 
Син Ходайдан зур бүләк.
Роберт иҗат чишмәсе
Эчеп туймас гаделлек”.

Беренче Президентыбыз шигырьләрне еш язмавын, язган очракта, йөрәктән сугарылуын искәртеп узды. 
- Роберт Миңнуллин тирән эз калдырды. Бик тирән эз калдырды! Бүген җыелышып истәлек тактасы ачарга килгәнегез өчен бик зур рәхмәт үзегезгә,  – дип сүзен тәмамлады Минтимер Шәрип улы. 

Чарада шулай ук Татарстан Дәүләт Советы Рәисе Фәрит Мөхәммәтшин, Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов, Татарстан язучылар берлеге рәисе Ркаил Зәйдулла, халык шагыйре Рәдиф Гаташ һәм халкыбызның башка күренекле вәкилләре катнашты. 
Роберт абыйның хатыны Клара апа бик дулкынланып чыгыш ясады, аның йөрәк ярасы әле дә төзәлеп җитмәгәнлеге калтыранган тавышыннан ук сизелеп торды. 

“Робертның киткәненә инде өч ел булып килә. Аны бер секундка да онытканыбыз юк. 

Барыгыз да әйтте: Роберт, чыннан да, популяр булды. Мин моңа ышанып әйтәм, чөнки ул халыкчан, гадел булды, артистланып йөрмәде. Күп сөйләшә торган кеше булмады. Күп сөйләшмәсә дә, Робертны әбиләр дә, бәбиләр дә ярата иде. Төрле яктан уратып алалар, аның белән чират торып фотографиягә төшәләр иде. 

Ул өйдә дә шундый ук йомшак булды. Йомшак булса да, бик характерлы кеше иде ул. Максат куеп, үзенә ышанып, төрле җирләрдә эшләде. Алга бара торган кеше иде”, – диде Клара Миңнуллина.

Чара тәмамлангач та, кешеләр шактый вакыт таралышмыйча торды. Суык көндә кайнар чәй эчәргә ашыкмау Роберт Миңнуллинның чыннан да халык шагыйре булуы турында сөйли.