16+

«Мин теге дөнья барлыгына ышанмый идем»

Тормышта әллә нинди сәер хәлләр булып тора. Ышанмаган әйберләргә дә ышана башлыйсың.

«Мин теге дөнья барлыгына ышанмый идем»

Тормышта әллә нинди сәер хәлләр булып тора. Ышанмаган әйберләргә дә ышана башлыйсың.

... Безнең бистәдә хат ташучы булып эшли торган апа көнгә ничә чакрым юл үтә икән? Хезмәт хакы 27 мең сум. Андый акчага эшләргә, карда да, яңгырда да, эсседә дә көн саен бер квартал әйләнергә теләк белдерүчеләрдән чират җыелмый. Шул кадәр йөреп, аяклары авырта аның. Гел сукрана соңгы арада.

Бер көнне шул апа миңа 3 инжир алып кайтып бирүемне сорады. «Төш күрдем. Төшемдә бер хатын 3 инжир ашарга кушты. Шуннан аягыңның авыртуы бетә, диде». Алып кайттым мин хат ташучы апага инжирны.

Берәр атна узгач, очрагач сорадым үзеннән. «Аягым хәзер алай авыртмый, күз алдыңа китерәсеңме, Лилия! Вәт могҗиза!», дип сөенече белән уртаклашты.

инжир.ф ото нейро
Фото: нейрочелтәр ярдәмендә әзерләнде

Төшләр белән бәйле тагын бер тарих. Монысын Зөлфия исемле ханым сөйләгән иде.

«Кечкенә чакта бик чая күрше кызы бар иде. Ул миннән өлкәнрәк. Берсендә, мәктәпкә барыр алдыннан, әни миңа дәфтәр-карандашлар алырга 5 сум акча бирде. Ул вакытта 5 сум бик зур акча иде! Шул күрше кызы белән киттек кибеткә. Миңа кирәкле әйберләр барысы да булмады һәм минем 3 сум акчам калды. Бу кыз, ул акча сиңа кирәкми, әйдә миңа биреп тор, дип, калган акчаны үзенә алды. Әнигә ничек аңлатканмындыр, хәзер хәтерләмим. Кыскасы, бу миңа акчаны кайтармады. Мин инде ул бурычны оныттым.

Үсеп, таралыштык. Инде картайдык. Бу күрше кызы күптән вафат. Бер-ике ел элек мин аны төштә күрдем. Шул өч сумны оныта алмыйсың инде, дип ачуланды мине. Уянгач нинди өч сум икән дип, берничә көн искә төшерә алмый йөрдем. Аннан гына аңладым. Мин теге дөнья барлыгына ышанмый идем. Шул төштән соң ышана башладым », - дип бәян итте Зөлфия апа төшен.

Төшләр үзе бер дөнья шул. Ышанмас җиреңнән ышандыра торганнары була...

Лилия Хәсәнова.

Кызыклы яңалыкларны күзәтеп бару өчен безнең МАХ каналына кушылыгыз. 

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading