Олимпиада җитә: тагын кысрыклаулар башланды

Моңа кадәр Халыкара Олимпиада комитеты чаңгычы Александр Легков белән Евгений Беловны гомерлеккә Олимпиадада катнашу мөмкинлегеннән мәхрүм итте, чаңгычыларның барлык җиңүләрен юкка чыгарды. Аларны допинг куллануда гаепләделәр. Янәсе, спортчылар биргән анализ савытларының капкачы тырмалган, бу анализлар алмаштырылган. Моннан тыш, дүрт чаңгычы – күзәтү астында. Тагын сигез спортчыны тикшерә башлаганнар.

Ирек Зиннуров, ике тапкыр Олимпия уеннары чемпионы, Россия Дәүләт Думасы депутаты:

– Бу – Россиягә каршы барган сәясәтнең бер төре. Безне икътисади яктан гына түгел, спорт өлкәсендә дә кысрыклаулар була дип кисәткәннәр иде инде. Элек спорт – берләштерә торган көч иде, хәзер, киресенчә, безгә басым ясау коралы. Кызганыч, моннан бары тик спортчылар гына зыян күрә. Безнең як та җавапсыз калмас дип уйлыйм.

Олимпиада ачылышында катнашмау спортчылар өчен зур югалту түгел. Миңа, мәсәлән, беренче тапкыр бик кызык, тантаналы булды. Аннан соң эссе­дә, халык алдында торасы килми башлый. Ачылыш вакытында арыйсың, бу ярыш нәтиҗәсенә дә йогынты ясарга мөмкин. Ә менә гимнны ишетәсе килә, әлбәттә. Бу – спортчы өчен зур стресс. Ләкин нинди генә тыюлар булуга карамастан, мин Олимпиадада катнашыр идем. Спортчы, ярышка чыгып, ил данын яклый. Спортчы данын исә дәүләт, Спорт министрлыгы, Олимпия комитеты кайгыртырга тиеш.

Фото: sport.bigmir.net