Пилмәннән – помидорга «күчкән» Илдар Зәйнуллин: «Акчасын да аз түләмибез, тик эшләргә кеше юк»

– Пилмән җәй көне генә күпләп сатыла, артык табыш китерә торган эш түгел, шуңа да үземне бакчачылык өлкәсендә дә сынап карарга булдым. Бу әле беренче адымнар гына. Үз ялгышларыбызны төзәтә-төзәтә өйрәнәбез, – ди Илдар Зәйнуллин.

25 сотый җирдә – помидор, 75 сотыйда кыяр үстерә. Орлыкларның күбесен читтән кайтарта. «Сарман пилмәне» брендының тиз арада популярлашу сере белән кызыксынам. «Вакытында ясалган реклама», – ди Илдар абый. Ә менә кыяр, помидорларына реклама кирәк тә түгел. Тәмен бер белгән кешеләр, нәкъ менә Илдар абыйның яшелчәләрен сорап, тагын киләләр. Юл өстендәге кибетеннән күз ачып йомганчы сатып алып бетереп баралар.

Теплицада мунчадагы кебек, җылы, яшеллек, хуш ис
– Пилмән ясау цехына караганда рәхәтрәк монда, кәефсез килсәң дә, күңел күтәрелеп китә, яшеллек начар энергияне үзенә йота, күрәсең, – ди әңгәмәдәшем.

Кыярның нинди генә төрләре юк, тозлар өчен уртача зурлыкта өлгерә торганнары, «корнишон» дигәне, «директор» сорты...

Эшмәкәрлек өлкәсендә проблемаларсыз да булмый. Илдарны су җитмәү мәсьәләсе борчый. Янәшәдәге елгадагы судан файдалану өчен Экология министрлыгыннан рөхсәт кирәк. Теплица территориясендә скважина да казып караган бакчачы, әмма суның сыйфаты канәгатьләндермәгән.

– Каты су чыкты. Аны яшелчәгә сибеп булмый. Кыярның тәме судан тора бит. Су җитәрлек һәм сыйфатлы икән, кыяр да сусыл була, әче тәм килми, – ди.
Тагын бер зур проблема – эшчеләр җитмәү. Җитәкче булса да, Илдар үсентеләрен дә бәйли, кыярын, помидорын да җыя, суын да сибә.

– Югыйсә акчасын да аз түләмибез. Аена 25 мең сум тирәсе хезмәт хакы чыга. Берара үзбәкләр ярдәм итте, ләкин хәзер алар да китте, – ди Илдар.
Шулай да өметен өзми. Һәр уңыш та авырлыклар аша килә, үз тәҗрибәсеннән белә. Әлегә теплицасы октябрь аена кадәр генә эшләсә, киләчәктә аны ел әйләнәсе эшли торган итеп җайларга уйлый.

Сарман