Рөстәм Миңнеханов: "Хыялланыгыз һәм максатларыгызга ирешегез!"

Кадерле дуслар! Сезне  Россия студентлары көне уңаеннан чын күңелдән котлыйм!

Россиядә беренче университет ачылган вакыттан җәмгыятьтә  Студентлар бәйрәме укучы яшьләрнең бердәмлеге, татулыгы, туганлыгы билгесе буларак кабул ителә. Татарстанның югары уку йортларында белем алучы 140 меңнән артык  егет һәм кыз бу көнне тантаналы төстә билгеләп үтә. Үсү-камилләшүне, алгарышны өстен күргән,  тырыш, актив, талантлы яшьләр – безнең мактанычыбыз. Аларның укуда гына түгел, фәндә, спортта, сәнгатьтә казанышларга омтылуы хөрмәткә лаек. 

Татарстан хәзерге көндә мәгариф һәм һөнәри осталыкка  ия булган хезмәткәрләр әзерләү  өлкәсендә кайбер төп юнәлешләр буенча алдынгылар сафында бара. Безнең студентлар һәм яшь белгечләр мәртәбәле илкүләм, шулай ук халыкара конкурсларда һәм олимпиадаларда зур җиңүләр яулый. Республика югары уку оешмаларының берьюлы бишесе узган елда «Приоритет-2030» программасына кертелде. Без шулай ук 2021 елда Россиядә иң яхшы студент дип танылган егетнең Татарстанда укуы белән дә горурланабыз.