Рөстәм Миңнеханов «Татхимфармпрепараты» җитештерү мәйданчыгында булды

Бүгенге көндә предприятиенең номенклатурасы 131 дару препараты тәшкил итә, шуларның 60ы яшәү өчен кирәкле дарулар исемлегенә керә. Аларга бәяләр дәүләт тарафыннан контрольдә тотыла, дип хәбәр итә ТР Президенты Матбугат хезмәте.

Сәфәр барышында Татарстан Республикасы Президентына хәбәр ителгәнчә, 2021 елда «Татхимфармпрепараты» 85,6 млн төргәк дару төймәләре, 30,6 млн. төр мазь һәм сыек препаратлар, 598 мең төргәк тегү-хирургия материаллары эшләп чыгарган.

Хәзерге вакытта завод штат режимында эшли. Предприятие берничә айга чимал, компонентлар һәм чыгым материаллары белән тулы күләмдә тәэмин ителгән. Санкцияләр белән бәйле рәвештә, завод дару препаратлары өчен компонентлар, шулай ук лаборатор анализ өчен чыгым комплектлары китерү максатыннан яңа логистик чылбырлар төзү эшен башлады. "Кызганычка каршы, логистика буенча сораулар бар. Әмма болар барысы да җайга салыначак. Бездә төп чимал Кытайдан һәм Һиндстаннан килә. Безнең җитештерү препаратлары булачак, без тыныч эшләргә планлаштырабыз, хәтта, бәлки, җитештерү күләмнәрен арттырачакбыз», - диде «Татхимфармпрепараты» АҖ генераль директоры Тимур Ханнанов.

Махсус күргәзмә кысаларында Татарстан Президентына шулай ук фармакология өлкәсендә эшләнмәләр, шул исәптән импортны алыштыра торган препаратлар: «Такролимус» һәм «Феломика» (трасплантологиядә кулланыла), «Абиратерон» һәм «Капецитабин» (онкоавыруны дәвалау), «Митотан» (шешкә каршы препарат) тәкъдим ителде. Шәхси яклау чаралары (яклау костюмы, респираторлар) һәм медицина зондын җитештерү турында сөйләделәр. Шулай ук күргәзмәдә Медицина сәнәгать паркы резидентлары җитештерә торган медицина эшләнмәләрен - анализаторлар, реагентлар һәм клиник анализлар өчен чыгым материалларын күрсәттеләр.