Сабада янгын: 2 июнь кара тамгалы көн

Ярый әле янгын сүндерүче егетләр тиз килеп җиткән. Аз гына соңласалар да, ялкын Сабирҗановларның сарайларын да көл итәргә җитешер иде югыйсә. 

Мин дә, хатыным Мәрвә дә иртүк эшкә чыгып киттек. Үзем автобуста эшчеләр йөртәм, хатыным кибеттә сатучы булып эшли. Төштән соң күршеләр безнең өйдән төтен күтәрелгәнлеген күреп, хатыныма шалтыратканнар. Мәрвә кайтып җиткәндә өйгә ут элгән, янгын сүндерүче егетләр инде су сиптерергә керешкәннәр иде, ди. Алар килмәсә, сарайга гына түгел, күршеләргә дә ут эләр иде. Нишлисең инде, без күрәсен кеше күрми, – ди гаилә башлыгы Илһам әфәнде. 

Йорттан бернәрсә дә алып чыга алмыйлар. Барысы да яна, киемнәре дә, көнкүреш техникасы да, йорт җиһазлары да... Бер кат кием белән урамда басып калган Сабирҗановлар гаиләсе ул көнне туганнарында төн куна. 

Авыл халкы бик әйбәт, һәрберсе үзенә чакыра. Без ике буын туганнарга сыендык. Йорт урынын чистарттык инде. Әле документ эшләрен эшләп бетерәсе бар, аннары янгынның да нәрсәдән килеп чыгуына экспертиза белешмәләре әзер түгел – көтәсе, – ди Илһам әфәнде. 

Гадәттә, киләсе кайгы алдан нинди дә булса хәбәрен ирештерә. Ләкин бу юлы ул да мәкерле кылана – “эндәшми”. Аны-моны сизенмәдек, ипле генә, тыныч күңел белән яши идек, ди гаилә башлыгы. Әти-әнисенең нигезе – төп йортлары булган ул. Узган ел эчке ягын төзекләндергәннәр, быел исә тышлаганнар. Тырышып яшәп ятканда зур сынауга тарыганнар. 

Ике бала үстердек, кызыбыз Айгөлне дә, улыбыз Алмазны да башлы-күзле иттек, 5 онык сөябез. Бу тормыштан әллә ни күпне дә өмет итмәдек, булганына риза идек тә, әллә соң шөкер дияргә оныттыкмы икән дибез. Инде яңадан аякка басасы, җиңел булмас, шулай да түзәсе. Рәхмәт, бик күпләр ярдәм итте, булганына шөкер, – ди Илһам әфәнде. 

Сабирҗановлар гаиләсенә ярдәм итәргә теләүчеләр 89376208176 телефоны аша Илһам әфәнде белән хәбәрләшә ала.