Шәхси йортлар кишәрлекләре чигенә кадәр газ бушлай сузып бирелә

Россия Федерациясе Президенты Владимир Путин күрсәтмәсе нигезендә, 2021 елдан башлап, шәхси йортлар кишәрлекләре чигенә кадәр газ бушлай сузып бирелә.

Программада катнашу шартлары:

 Шәхси йорт кишәрлегенә кадәр бушлай газ сузу үзәк газүткәргечләре булган торак пунктларда башкарыла. Әйтик, авыл урамы буенча газ торбасы инде сузылган. Кайсыдыр йортка газ кертелми калган яки яңа йорт төзелгән. Менә шундый йортлар кишәрлегенә кадәр газ торбасы бушлай сузып бирелә. Йортның шәхси милек икәнлеген раслаучы документлар зарур. Газ куллану, фәкать, өйне җылыту һәм ризык әзерләү максатында гына булырга тиеш. Эшкуарлык максатларындагы шәхси йортларга һәм корылмаларга газ бушлай сузып бирелми.

 Ташламалар

 Бөек Ватан сугышы ветераннарына, 18 яшькә кадәрге 3 баласы булган гаиләләргә, инвалид-бала тәрбияләп үстерүче гаиләләргә, шулай ук уртача керемнәре 10 мең сумнан артмаган гаиләләргә йорт эченә газ керткән һәм газ аппаратлары урнаштырган өчен соңыннан 80 мең сум субсидия кайтарып бирелә.
 — Илебездә җитештерелгән газ аппаратларын һәм җиһазларын урнаштырган очракта, йорт эчендәге эшләр 120 мең сум тирәсендә килеп чыга. Татарстан Хөкүмәте 2023 елның мартыннан әлеге субсидияне 80 мең сумнан 100 мең сумга кадәр арттырырга ниятли, - диде Рөстәм Усманов “Шәһри Казан” газетасы хәбәрчесе соравына җавап биреп.

 Клублар читтә калган

 Татарстанның сәнәгать һәм сәүдә министры урынбасары Марат Минибаев сөйләгәнчә, медицина һәм мәгариф учреждениеләре урнашкан кишәрлекләр чигенә дә газ торбалары бушлай сузып бирелә.
— Медицина яки мәгариф биналары эченә газ кертүне ведомстволар инде үзләренең хисабына башкара. Клубларга газ сузу исемлектә юк. Муниципаль берәмлекләр бу очракта гариза бирергә тиешләр,- диде Марат Минибаев.

Шәхси йорт кишәрлеге чигенә кадәр бушлай газ сузуга гаризаларны Газлаштыруның бердәм операторы (Единый оператор газификации) порталы яки Дәүләт хезмәт күрсәтүләре сайты аша тапшырырга, шулай ук районнардагы газ хезмәтләренә дә бирергә мөмкин.

 Куен дәфтәренә

Шәхси йорт кишәрлеге чигенә кадәр газ сузу мәсьәләсенә кагылышлы сорауларга җавапларны Газлаштыруның бердәм операторының мәгълүмат үзәгеннән белешергә була, телефон: 8-800-101-00-04.

“Газпром трансгаз Казань” оешмасының “кайнар элемтә” телефоны: 8-843-288-26-14, 8-843-288-26-16, 8-843-288-23-11.