Социаль челтәрләр заманча наркотик икән бит!

Экспертлар фикеренчә, Россиядә язылучылары 1 миллионнан артып киткән 1100 блогер исәпләнә, 100 меңнән 1 миллионга кадәр – 18,5 мең кеше, 10 меңнән 100 меңгә кадәр язылучысы булган 255 мең кеше бар. Аларның һәрберсе реклама һәм башка интеграцияләрдән керә торган табышларын мәхрүм калды. Ә бу сумма елына 100 миллион доллардан артып китә. Кайберәүләре Инстаграм ябыласын ишеткәч, шешенеп елап та алды, янәсе шул проектларын үстерер өчен ничә ел гомер һәм күпме көч түгелгән.

Финанс ягы аңлашыла инде, тик менә кешеләрнең социаль челтәрләргә шулкадәр бәйле булуы бик аяныч хәл кебек тоела бит әле. Instagram эшчәнлеген туктатачак дигән хәбәр чыгуга, күпләр пошаманга калды, анда керү өчен төрле юллар эзли башлады. Ябылу истериясе наркоманнарның “ломкасын” хәтерләтә, алар доза җитмәсә котырына, нишләргә белми, үзенекен эшләр өчен теләсә нәрсәгә әзер. Безне социаль челтәрләргә нык итеп бәйләп куйганнар, ләбаса. Алардан башка тормыш бармый диярсең! Шушы килеп туган буш вакытны балаларың, әти-әниең, хатының яисә ирең белән аралашуга тот, бәлки бик шәп сердәшләр булып китәрсез, яхшы кеше икәнлеге аңлашылыр. Монысы инде юмор иде, әмма анда да чынбарлык ярылып ята.

Чит илләр безне үзләренең продукциясенә, ширкәтләренә һәм брендларына утыртты инде, социаль челтәрләре белән дә күз алдында тоталар булып чыкты. Тулысынча Көнбатышка бәйле булуы эчтә шом тудырмыйча калмый. Instagram белән TikTokтан башка яшәргә күнегербез инде, әнә күбесе Телеграм һәм Вконтактега күчеп бара, Одноклассники да искә төште. Үзебездә RuTube дигән видеоплатформа да, Ярус атамалы социаль челтәребез дә бар әле. Алга таба шунда аралашырбыз. Ә менә тулысынча чит илгә бәйле булган юнәлешләрдә нишләрбез – анысы билгесез. Импортны алмаштыру өчен Көнбатыштан килүче компонентлар җитеп бетми, дигән мәзәк бик актуальләште булса кирәк.

Рәсим Хаҗиев

Фото: https://pixabay.com/