Тагын корбан чаласы буламы?

Гает көнне корбан чалган идек. Мәчеттә сарыкны тиз генә чалып, эшкәртеп, әйбәтләп бүлеп тә бирделәр, сөенә-сөенә алып кайтып, суыткычка тутырып куйдык та дачабызга киттек. Берничә көннән кайтып керсәк, суыткычыбыз эшләүдән туктап, итләр сасып беткән. Корбанлыкны акчасын жәлләп тә чалмаган идек, ниятебез изге иде. Насыйп булмагач, үзебез дә ашарга, туганнарга да таратырга өлгерми калдык. Хәзер безгә кабат корбан чаласы буламы икән инде?
Нурия Җәүдәтова, Казан.

«Өметлеләр» мәчете имам хатибы Алмаз хәзрәт Сафин: 
– Борчылмагыз, корбанлыкны яхшы уйлар белән ниятләп, хәләл акчагызны түләп чалдыргансыз. Аллаһы Тәгалә аны кабул иткән, иншалла. Тагын корбанлык чалырга кирәкми.