Таңсылу Роберт Миңнуллин исемендәге татар әдәбиятына һәм сәнгатенә ярдәм Фонды ачкан

"Әтинең иҗатын сүрелдермәү, халык арасында алга таба да яшәтү, буыннан-буынга тапшыру... Бу максатларга ирешүнең бер формасын эзләдем... Ниһаять, озак вакыт эзләнеп, аннан ниятләп йөргәч очына чыктым.

Татарстанның халык шагыйре Роберт Миңнуллинның иҗади мирасын саклап калу, популярлаштыру һәм киләсе буыннарга түкми-чәчми җиткерү максаты белән Роберт Миңнуллин исемендәге татар әдәбиятына һәм сәнгатенә ярдәм Фонды үз эшчәнлеген башлап җибәрде! Аллага тапшырдык!

Фонд эшчәнлеге кысаларында үткәрелә торган беренче чара - Роберт Миңнуллинның балалар иҗатына багышланган "Шигърияткә сәяхәт" исемле республика балалар бәйгесе бүгеннән старт алды! Бәйге Роберт Миңнуллин исемендәге Республика балалар китапханәсе белән берлектә оештырыла.

Бәйге балалар һәм яшүсмерләр арасында Роберт Миңнуллинның иҗатын өйрәнү, популярлаштыру, балаларның һәм яшүсмерләрнең иҗади сәләтләрен барлау, үстерү, Роберт Миңнуллин иҗаты аша балаларда һәм яшүсмерләрдә татар теленә һәм сәнгатенә кызыксыну уяту һәм тәрбияләү йөзеннән оештырыла.

Тулырак мәгълүмат белән Р.Миңнуллин исемендәге Республика балалар китапханәсенең рәсми сайтында түбәндәге сылтама буенча танышып була.

Иҗат белән кызыксынучы, Роберт абыйларының шигырьләрен яратучы 5 яшьтән алып 14 яшькә кадәрге балалар һәм яшүсмерләр әлеге бәйгедә катнашып үз көчләрен сынап карый алалар, алай гына да түгел, шул исәптән, Шагыйрь абыйларының иҗатын саклап, популярлаштыруда да үз өлешләрен кертерләр иде!

Фонд эшчәнлегенә бәйле фикерләр, теләкләр булса, мин һәрчак риза! Алдан ук рәхмәт!" - дип язган Таңсылу.