Татарстанда салкын боз да динара һәм милләтара дуслыкны ныгыта

- Мөселманнарның һәм христианнарның бергәләшеп хоккей уйнау турниры дөньяның башка бер җирендә дә юк. Татарстанның хоккей федерациясе тәкъдимендә мөселман һәм православие диннәре вәкилләре командалары арасында тәүге уеннар 2021 елда үткәрелде, анда Татарстаннан һәм Башкортстанның Салават шәһәреннән 6 команда чыгыш ясаган иде. Татарстан мөселманнары Диния нәзарәте белән Рус православие чиркәвенең Казан епархиясе республиканың хоккей федерациясе башлангычын хуплады. Татарстан Президенты Рөстәм Миңнеханов та тәүге турнирны карарга килгәч, “дуслык атмосферасы хөкем сөргән бу уеннарны матур традициягә әверелдерергә кирәк”, дип әйтте, - диде Татарстанның хоккей федерациясе вице-президенты Андрей Рябов журналистлар өчен оештырылган матбугат конференциясендә.
Татарстан мөфтиенең беренче урынбасары Илфар хәзрәт Хәсәнов республикада Татарстан мөселманнары Диния нәзарәте белән Казан митрополиясенең дус яшәвен искәртеп, барлык мөселманнарны һәм христианнарны киләчәктә дә дус яшәргә чакырды. Протоиерей Владимир Самойленко христианнарның һәм мөселманнарның бергәләшеп хоккей турниры үткәрүен “бөек башлангыч” дип атады. “Безнең бөек Татарстаныбыз алга барсын, бу дуслык булганда гына мөмкин. Бүгенге вазгыятьтә без аеруча дус һәм бердәм булырга тиеш”, - диде ул.

Казан шәһәре Башкарма комитетының физкультура һәм спорт комитеты рәисе Линар Гарипов хәбәр иткәнчә, 1 февральдә 14.00-16.00 сәгатьләрдә “Ак Барс Арена” бозында шәһәрнең “Алтын алка” турнирына да старт бирелә.
Төнге Хоккей Лигасының төбәк вәкиле Альберт Кильдеев 3 февральдә 19.30 сәгатьтә “Ак Барс Арена” да Төнге Хоккей Лигасы уенчыларының традицион матчы булачагын әйтте.
Татарстан мөселманнары Диния нәзарәте белән Рус православие чиркәвенең Казан епархиясе оештырган быелгы “Кубок Дружбы-Дуслык” турнирында Россиянең 6 төбәгеннән 250 спортчы катнаша. Санкт-Петербург, Кузнецк шәһәрләреннән, Башкортстан һәм Мордовия республикаларыннан хоккей командалары килә.

3 февраль:
Спорт Сараенда (Мәскәү урамы, 1) 15.30 сәгатьтә турнирны ачу тантанасы була. Тантаналы өлештән соң, шунда ук “Татарстан Республикасының хоккей буенча хатын-кызлар җыелма командасы” белән “Раифа училищесы” командасы бозга чыга, ягъни кызлар командасы егетләр командасына каршы уйный;
4 февраль:
Спорт Сараенда 17.30 сәгатьтә “Хоккей- һәркемгә” хәйрия матчы;
5 февраль:
Спорт Саренда 10.00 сәгатьтә финал матчлары башлана. Чемпион калган командага Кубок бирелә, акчалата бүләкләү каралмаган. 
2 февраль:
“Биектау” спорт сараенда 18.00 сәгатьтә “Динамо”ның 100 еллыгына багышлап, “МВД” командасы белән “Дин әһелләре җыелма командасы” матчы үткәрелә.

Турнир Казанның Спорт Сараенда (Мәскәү урамы,1) һәм “Баско” Боз сараенда (Степан Халтурин урамы,3) узачак. Хоккей уеннарыннан тыш, балалар һәм өлкәннәр өчен концерт, күңел ачу программасы да әзерләнгән.