Татарстанның атказанган табибы Раиса Гуслякова: «Әгәр авыруны «йөрәгеңдә» сөйрәп барсаң, ул, гадәттә, исән кала»

Ул Татарстанда терапевт хезмәтен оештыруда башлап йөргән кеше. Тумышы белән Лаеш районыннан. 1951 елда, әтисе табиблар хатасы аркасында вафат булганнан соң, табиб булырга карар кыла. Медицина университетын тәмамлагач, яшь белгечне Алтай краена эшкә җибәрәләр. Далалар, кырлар, тозлы күлләр... Авыруларның да иң хәтәрләре очрый монда: корчаңгы, бавыр таркалу, үпкә ялкынсыну ди­сеңме? Җил, давыл чыккан чакларда, тузан бураннарыннан саклану өчен, табибларга битлек киеп йөрергә туры килә.
Казанга әйләнеп кайтканчы, шактый тәҗрибә туплый Раиса ханым. Ул гомеренең 50 елдан артык вакытын медицинага багышлаган, бүген дә эшләвен дәвам итә. «Заманча табиблар кара эчле, акча өчен генә эшли дигән сүзләрне ишетергә туры килә, ләкин моның белән килешмим», – ди Раиса ханым. Пациентка җаны-тәне белән ярдәм иткән, авыруны туганыдай кайгырткан яшь табибларны үз күзләре белән күргәне бар аның. Ә пациентларның рәхмәте – иң зур бүләк. Әнә бер пациентлары үз юбилеенда гомерен сак­лап калган табиблар алдында хәтта тезләнеп рәхмәт әйткән.
Пациент арасында төрлесе очрый, бәхәскә керәләр, ышанмыйлар, үпкәлиләр. Табиб исә һәрчак мондый бәхәсләрдән өстен торырга тиеш, интеллектын сакларга бурычлы, дип саный тәҗрибәле Раиса ханым.
Буш вакытында табиб балыкка йөри. Бу шөгыль ял итәргә, табигатькә якынрак булыр­га ярдәм итә аңа. «Пациентларны дәвалап булмаган очракта да, хәлләрен җиңеләйтергә кирәк. Иң мөһиме – янәшәңдә яраткан кешеләрең булу», – ди Раиса Гуслякова.

Татарстанның атказанган табибы Раиса Гуслякова:

Иммунитетны төшермәскә тырышыгыз. Иммун системасы нерв киеренкелеге аркасында какшый.

Үз белдеклегең белән дәваланмагыз.

Табиб белән пациент арасындагы мөнәсәбәтләр бик мөһим, авыру салкын карашны шунда ук тоя. Әгәр авыруны «йөрәгеңдә» сөйрәп барсаң, ул, гадәттә, исән кала.

50 ел сәламәтлек саклау системасында эшлим, әле дә пациентларымны яратам.

Теләсә кайсы табиб өчен төп максат – вакытында ярдәм күрсәтү, авыруның хәлен җиңеләйтү.

Без куркуны белми идек, яхшы белем алып, бу дөньяда үзебезне бар җирдә лаеклы хис итеп була, дип яшәдек.

^{Наил Нәбиуллин әңгәмәсеннән кыскартып алынды. Язма республика медицина китапханә-мәгълүмат үзәге}

^{һәм Сәламәтлек саклау министрлыгы белән берлектә әзерләнде.}