Валерий Тишков: "Халык санын алуда ким дигәндә ярты миллион татар исәпкә алынмаган"

Тишков фикеренчә, үз милләтен күрсәтмәгән 17 млн.кеше арасында, ким дигәндә, ярты миллионлап татар бар. “Халык санын алу пандемия, халык санын алучылар хезмәте өчен тиешенчә түләмәү, дәүләт хезмәте порталы аша язылу начар оештырылу, ММЧ һәм социаль реклама тарафыннан булган битарафлык аркасында начар узды. 17 млн. кеше (барлык халыкның 13 процентны) үз милләтен күрсәтмәгән. Алар арасында, ким дигәндә, 13,5 млн. кеше – руслар һәм 0,5 млн. кеше – татарлар”, - дип язган Тикшов социаль челтәрдәге сәхифәсендә.

Галим уйлавынча, милли республикалардагы титуллы милләтләр "тырышып" күрсәтелгән. Ә менә үз республикаларыннан читтә яшәүчеләр (мордвалар, татарлар һәм башкалар) тиешенчә исәпкә алынмаудан зыян күргән. Валерий Тишков канәгатьсезлеге халык санын исәпкә алуның начар оештырылуы белән дә бәйле. "Алары турында соңрак", дип язган ул.