Васил Шәйхразыев: "Алга китәргә дә мөмкинлекләр булачак"

X Бөтенроссия татар авыллары эшмәкәрләре җыены старт алу уңаеннан, Васил Шәйхразиев үзенең фикерләрен җиткерде:
– Россиягә карата кертелгән чикләүләр барлык кешеләргә дә йогынты ясый, шул исәптән, авыл эшмәкәрләренә дә. Аларга, бер караганда, авыр, ләкин, икенче караганда, әгәр син эшеңне үз командаң белән алып бара аласың, һәм хөкүмәт ярдәм итә икән, алга китәргә дә мөмкинлекләр булачак. Шуңа бу аралашулар безнең өчен бик мөһим, – диде ул.
Шулай ук Васил Шәйхразиев 2022 елда ике зур истәлекле чара узачагын да әйтеп үтте. Алар: Идел буе Болгар дәүләтендә Исламны кабул итүнең 1100 еллыгы һәм Бөтендөнья татар конгрессының 30 еллык юбилее, аның кысаларында чираттагы VIII Съезд.
– Без кайда гына булмадык. Мәскәү өлкәсе Орехово-Зуево шәһәренә дә бардык. Каршылаган оешманың директоры рус кешесе иде. Коллективында әрмән дә, рус та, башка милләтләр дә бар. Без килгәч, әрмән егете татарча җыр җырлады. Моны безнең өчен генә оештырмаганнар, аларның көндәлек тормышы бу. Рус кешеләреннән генә торган оркестр татар көйләреннән торган концерт программасын күрсәтте. Аны бер көн эчендә генә эшләп булмый. Мондый үрнәкләр төрле өлкәләрдә бар. Бу, чынлап та, зур горурлык! Татарларның, безнең җитәкчеләрнең эшләү билгесе. Моны үз күзләребез белән күреп, рәхмәт әйтү – аларга да бәрәкәт, безгә дә зур эш, – диде Милли Шура рәисе.
Бөтендөнья татар конгрессы Башкарма комитеты җитәкчесе Данис Шакиров Бөтендөнья татар конгрессының 30 еллык юбилее уңаеннан Устав нигезендә VIII съездына әзерлек эшләре белән таныштырып китте. Биредә оештыру эшләре, съездның концепциясе һәм катнашучылары хакында сүз барды.