Яңа уку елын 1 сентябрьдә мәктәпләрдә (онлайн) башлыйбыз

Урамда сөйләшсәң, яхшырак

Татарстан буенча Роспотребнадзор идарәсе җитәкчесе Марина Потяшина коронавируска бәйле вазгыять-хәл белән таныштырды.
— Коронавирус белән инде 5 ай яшибез, Казанда тәүге авыручы 15 мартта теркәлгән иде. 2 августтан башлап коронавирус йоктырып авырып китүчеләр саны артуы тукталды, - диде Марина Потяшина. - Ләкин, санитар таләпләрне үтәү зарур. Сәүдә үзәкләре һәм җәмәгать туклануы предприятиеләре хезмәткәрләре битлек белән перчаткадан булырга тиеш, бу таләпне җәмәгать транспортында йөргәндә дә үтәргә кирәк.

— Мәктәпләрдә гомүм линейкалар, балалар бакчаларында гомүм “утренник”лар оештырылмый. Татарстан Президенты мәктәпләрне һаваны бактериологик зарарсызландыру электр аппаратлары белән җиһазландыру өчен акча бүлеп бирде. Әлеге аппаратлар кайтып җиткәнче бүлмәләрне тәнәфесләр һәм сменалар саен җилләтү зарур. Көннәр җылы, шунлыктан, ата-аналар җыелышларын да урамда яки онлайн режимда үткәрү яхшырак булыр иде. Ата-аналарның җыелышларда битлектән булулары шарт,  - дип киңәш итте республиканың баш санитар табибы.

Температурасы югары булган кеше мәктәпкә кертелми. Сыйныфта кимендә 3 укучы авырып китсә, дәресләр онлайн режимга күчерелергә мөмкин.

Марина Потяшина Казаннан Төркиягә авиаочышлар кабат башланганлыгын искәртеп, туристлык сәяхәтләрендә сәламәтлеккә игътибарлы булырга чакырды. Рәсми кунакханә-отельләргә генә тукталырга кушты ул. Төркиядә битлексез җәмәгать транспортында, таксида йөрмәвең хәерле, хостелларга да урнашмаска тырышыгыз. Чит илдән кайткан кешеләр 3 көн эчендә коронавируска тикшерү узарга тиеш. Мондый тикшерүне “Казан” аэропортындагы лабораториядә дә узарга була.

Коронавируска тикшерү узмаган “турист” 15 меңнән 40 мең сумга кадәр штрафка тартылырга мөмкин.

Республиканың сәламәтлек саклау министры урынбасары-шәһәрнең сәламәтлек саклау идарәсе җитәкчесе Владимир Жаворонков хәбәр иткәнчә, Казанда сентябрь һәм октябрь айларында халыкка грипптан прививка үткәрелә. Метро станцияләре һәм эре сәүдә үзәкләре янында табипларның күчмә бригадалары эшләячәк, шулай ук сайлау көннәрендә сайлау участокларында да гриппка каршы привика ясатып булачак.

Казан мэры Илсур Метшин үзенең фикерләре белән уртаклашканда прививка ясатуга, мәктәпләрдә коронавируска каршы чараларга гаять җаваплы мөнәсәбәттә булырга чакырды.