Бурычың булса, сәүдә үзәгенә барма

Махсус бурычлылар базасы аша машина хуҗасының түләнмәгән штрафлары барлыгы ачыклана, кирәк очракта бу кешегә карата чаралар күрелә. Бурыч дигәндә ЮХИДИ штрафлары гына түгел, түләнмәгән кредитлар, салымнар, коммуналь хезмәтләр, алиментлар да керә. Әлеге мобиль кушымта, "Юл приставы" программалары нигезендә 3 ай эчендә Казанда 300 бурычлы кешене тоткарлаганнар. Ә башкалада барлыгы 200ләп дәүләткә бурычы булган кеше исәпләнә икән. Авиатөзелеш районы суд приставлары журналистлар белән берлектә бурычлыларны ачыкларга Казандагы бер сәүдә үзәгенә юл тотты. 40 минут эчендә машина номеры аша дүрт бурычлыны тоткарлый алдылар. Бурыч суммалары да төрле - 500 сумнан алып 500 меңгә кадәр.

- Федераль закон нигезендә без бурычлы кешене тоткарлый алабыз. Әгәр бурычы 3 мең сумнан артып киткән икән, милкенә арест салырга да хакыбыз бар. Гадәттә, бурычлының кесә телефоны, видеотеркәү җайланмасы, запас көпчәге, башка кыйммәтле әйберләре алына. Шулай ук урында ук бурычны түләп, әҗәттән котылу мөмкинлеге дә бирелә. Әгәр дә түләнмәгән штрафлар 100 меңнән дә артып китә икән, машинаны ук алачаклар, үзебездә җитештерелгән транспорт чарасына арест салу өчен 70 мең бурычың җыелу да җитә, - ди. Казан шәһәре суд приставларының Авиатөзелеш районара бүлек башлыгы - өлкән суд приставы Рамил Шиһапов.

Мондый рейдларны суд приставлары банклар, ЮХИДИ хезмәткәрләре банк хезмәтләре белән берлектә ел дәвамында үткәреләчәк.

^{Фото: Алинә Минневәлиева}