«Черная пятница» дип алданмагыз

Бу – кибетләр үз товарларын иң түбән бәядән тәкъдим итә торган акция көне. Изге җомгага бәйле көнне без башкача атарбыз инде – “ташламаларга бай җомга”.

Берничә көн дәвам итәчәк ул. Акция ваклап сату һәм интернет-кибетләрне дә колачлаячак. Экономияләргә яратучылар барлык кирәкле әйберләрне – продуктлардан алып күчемсез милеккә кадәр – шактый ташламалар белән сатып ала алачак. 

Кайчагында ритейлерлар акцияне башка көннәрдә игълан итә - кемдер итәрәк, кемдер соңрак. Шуңа күрә, сатып алуларны планлаштырганда, үзегезне кызыксындырган кибеттәге шартларны алдан ук өйрәнегез.

Бу көннәрдә нервларны һәм акчаларны саклап калу һәм акчагызны юк-барга сарыф итмәс өчен безнең киңәшләрдән файдаланыгыз.

1. Исемлек төзегез
Без еш кабатлаган кагыйдәне истә тотыгыз: кибеттән артыгын сатып алырга теләмисез икән – исемлек белән йөрегез. Бу киңәшне хәзер дә кулланыгыз, чөнки «ташламалар 90 процентка кадәр» язулары белән башыңны югалту бик җиңел. Сатып алырга планлаштырган исемлек вакытында туктарга һәм юк-барны сатып алмаска ярдәм итәчәк.

2. Алдан әзерләнегез
Сатып алуны планлаштыру берничә ай алдан - ноябрь сатулары чорында зур ярдәм. Җәй ахырында - көз башында сез «кара җомга»да сатып алырга теләгән товарыгызның исемлеген төзегез, һәм, вакыт-вакыт, аның бәяләр тирбәнешләрен күзәтегез. Шулай булгач, сатучы акция алдыннан ясалма рәвештә бәяне арттырса, сез моны инде беләчәксез. Бу эштә компьютер яки телефон өчен төрле программалар һәм кушымталар ярдәм итәчәк, алар сезнең өчен сайланган товарларның бәясен күзәтәчәк. Алдан уйламаган булсагыз да, интернет-кибетләрдә бәя динамикасы һәрвакыт күренә. 

3. Китереп бирү шартларын белегез
Әгәр дә сез онлайн сатып алырга теләсәгез, алдан ук товарның ничек китерелүе белән танышыгыз. Һәр интернет-ритейлер бушлай һәм түләүле китерү өчен үз кагыйдәләрен билгели. Бу моментны түләүгә кадәр ачыклагыз, китереп бирү товар алу сатып алуга караганда кыйммәткәрәк чыкмасын.

4. Игътибарлы булыгыз
Шопинг – азартлы эш, монда мавыгып китү, уяулыкны югалту җиңел. Кассага ашыкмагыз: брак товар эләкмәгенме? Аны төрле яктан өйрәнегез, эшлиме-юкмы икәнен тикшерегез, яраклылык вакытын карагыз. Кайбер намуссыз сатучылар бозылган яки сыйфатсыз товардан котылырга тели. 

5. Кэшбеклы карталарны кулланыгыз
Әгәр сез күп акча сарыф итәчәгегезне төгәл беләсез икән, дебет яки кредит картасын рәсмиләштерергә иренмәгез. Аның белән түләгәндә, сарыф ителгән акчаның процентын сез кире алачаксыз. Күпме булуы – картаны рәсмиләштергән банк шартларына бәйле. 

Тагын нәрсәдә экономияләргә?
Статистика буенча, бу көнне сатып алынган товарларның иң популяр категорияләре булып кием-салым, спорт товарлары, көнкүреш техникасы, электроника тора. Әмма белгечләр кулланучыларны киңрәк фикер йөртергә чакыра. Мәсәлән, сату чорында ташламалар белән китаплар, авиабилетлар, турпутевкалар, спортзалга абонементлар, матурлык салоннарына һәм фитнес-үзәкләргә сертификатлар, шулай ук цифрлы продуктлар – белем бирү курслары, онлайн-кинотеатрларга язылу һәм башка бик күп нәрсәләр сатып алырга мөмкин.

Мошенниклар тик тормый!
Бу акциягә мошенниклар да әзерләнә. Шуңа күрә экспертлар уяулыкны югалтмаска куша. Киң танылган ресурсларда гына сатып алыгыз, шикле сылтамалар буенча күчмәгез. Алар сезне ничек кенә кызыктырсалар да, җибәрелгән сылтамалар яки реквизитлар буенча түләмәгез, яңа интернет-кибетләрдә теркәлмәгез һәм бигрәк тә аларга банк карталарын беркетмәгез. Ә тагын да яхшырак - түләү өчен махсус карта булдырыгыз һәм аны акча саны чикләнгән аерым счетка бәйләгез.

Лилия Яфизова
Фото: ru.freepik.com