Чүп җыеп «уйнап», бүләк алырга була. Ышанмасагыз, өмәгә килегез!

Татарстанда санитар чистарту икеайлыгы бара. Казанда 29 апрельдә йомгаклау өмәсе үткәрелә.

Казан мэры Илсур Метшин бу идеяне хуплап, башкаларга да үрнәк итеп куйды.

 —Районнар санитар икеайлыкта актив катнаша, Казан мэры Илсур Метшин чакыруына кушылып, шәһәребезнең чиста һәм матур булуын телибез. 29 апрельдә Порт урамын һәм А. Халиков урамы буенча “Локомотив” пляжына кадәр Идел елгасы яр зонасын чистартырга чыгабыз. Кыр кухнясы эшләячәк, -диде Вахитов һәм Идел буе районнары хакимияте башлыгы Альберт Салихов “Татар-информ” мәгълүмат агентлыгында уздырылган матбугат конференциясендә. 

 СИБУР компаниясе башлангычындагы “Чиста уеннар” проектына республиканың “КамаСтрой Инвест” һәм “СМУ-88” компанияләр төркеме кушылган.

 —Төзелеш барышында экологиягә зыян китермәскә тырышабыз, йорт тирәләренә агачлар утыртабыз, - ди “КамаСтройИнвест” компаниясенең коммерция директоры Михаил Петров. 

 —Татарстан Рәисе Рөстәм Миңнеханов белән Казан мэры Илсур Метшин хәзерге вакытта шәһәрдән “аерылган” Идел елгасы ярларын казанлылар тормышына актив кулланышка кертергә омтыла. Бу максатчан проектны без- төзүчеләр дә хуплыйбыз. Экология өмәләренә бердәм төстә чыгабыз. Безгә искерә төшкән яки киелмичә яткан өс киемнәрен дә китерергә була, без аларны мохтаҗларга тапшыру белән дә шөгыльләнәбез,- ди “СМУ-88” компанияләр төркеме директоры Наил Галиев.

 Вахитов һәм Идел буе районнары хакимияте башлыгы Альберт Салихов чакыруы буенча санитар чистарту өмәсендә катнашырга Чиләбе шәһәреннән Россия күләмендә танылган блогер Артур Матис-Сираҗиев та кайткан. “Чистомэн” блогы авторы да әле ул.

— 8 ел элек берүзем чыгып, елга буйларыннан чүпләр җыя башладым. Социаль челтәрләрдә башкаларга да дәштем, теләктәшләр елдан-ел артты. Экологиягә битараф булмаган кешеләр күп,-ди Артур Матис-Сираҗиев.

 Вахитов һәм Идел буе районнары хакимияте оештырган өмәдә катнашу өчен 29 апрельдә Елга порты каршындагы мәйданга 8.00 сәгатьтә җыелырга кирәк. Командаларның чүп җыю буенча “Чистомэн лигасы” 9.00 сәгатьтә старт ала. 10.30 сәгатьтә йомгак ясала һәм җиңүчеләргә бүләк тапшырыла.