Диктантны 94 яшьтә язу да мавыктыргыч шул

Чарада, милләтенә карамастан, теләге булган һәр кеше катнаша ала.

– Диктант тексты табигать, география темасына сайлап алына. Быелгысы көндәлекләр жанрына караган иде. Текст катлаулы булмаса да, сүзләрдә хаталар җибәрелгәли. “Тоталь диктант” рус теленә игътибар юнәлтә, китап укырга этәрә. Тел ул-олы хәзинә, телсез кешене галәмгә дә җибәреп булмый,-диде Казан федераль университетының филология фәннәре докторы Ирина Ерофеева “Татар-информ” мәгълүмат агентлыгында узган матбугат конференциясендә.

Тәүге “Тоталь диктант” 2004 елның 11 мартында Новосибирск дәүләт университетының “Глум-клуб”ында студентлар акциясе рәвешендә үткәрелгән булган. 2011 елдан ул Россия күләмендә уздырыла башлый, Казан диктант язуга 2012 елда кушыла.

– Быелгы “Тоталь диктант” чарасында Россиядән һәм тагын 55 илдән 1 294 401 кеше катнашты. Казанда 6529 кеше кулына каләм алды, бу Мәскәү һәм Санкт-Петербург шәһәрләреннән соң өченче күрсәткеч. Диктант язуда катнашкан иң өлкән бабайга – 94 яшь, ә иң кечкенә малайга 9 яшь иде. Диктантны “5” билгесенә язган кешеләргә кайбер электрон мәгълүмат чараларыннан бушлай куллану билетлары тапшырылачак. Татарстандагы отличникларны да бүләкләү булачак,-диде “Тоталь диктант”ның Татарстандагы төбәк координаторы Вячеслав Шаталов.