Каршерингмы, таксимы? Кайсысы отышлы?

Ягулык, салым, страховка, парковка, техник хезмәт күрсәтү дисеңме – бәяләр ай саен арта. Каршеринг яисә такси аңа альтернатива була аламы?

Бүген автоматта урта комплектациядәге яңа Кытай автомобиленең бәясе — өч миллион сум тирәсе. Бу Россиянең кайбер төбәкләрендәге бер бүлмәле фатир бәясе белән чагыштырырлык.

Әлбәттә, арзанрак вариантлар да бар: кулланылган автомобильләр базары яки Россиядә җитештерелгән яңа машиналар. Әмма алар да арзан бәяләр белән сөендерми. Миллионнар турында бара сүз...

Шәхси автога чыгымнар
Әгәр машина хуҗасы көн саен машинасында эшкә йөри икән, көн саен түләүле парковкалар һәм ял көннәрендә авылга кайтуны да исәпкә алсак, машинаның еллык йөреше якынча 20 мең километр тәшкил итәчәк.

 «Әйтик, яңа автомобиль ике миллион сум тора. Елдан-ел аның бәясе төшә, һәм биш елдан соң ул йөрешкә, техник характеристикаларга, комплектациягә, хезмәт күрсәтү шартларына бәйле рәвештә уртача 30-50 процентка арзанаячак», - дип белдерәләр халыкара аналитик маркетинг агентлыгы белгечләре. Ягъни автомобильче, үз машинасын кулланганда, елына 200 мең сум яки аена 17 мең сум “югалтачак”.

ОСАГО бәясе машина йөртү стажына, автомобиль маркасына бәйле булачак. Болар барысы да елына якынча 10 мең сум яки аена якынча 900 сум тәшкил итәчәк. Яңа автомобильгә техник хезмәт күрсәтү, кагыйдә буларак, кыйммәт түгел, чөнки җитди ремонт таләп ителсә, ул гарантия буенча төзәтелә, ә Кытай автомобильләренең күпчелегенә гарантия — биш ел. Шуңа күрә ориентир өчен планлы ТОны алырга кирәк, бу елына уртача 8-15 мең сум. Транспорт салымы - елына 6 мең сум тирәсе.

Резина комплекты уртача ике ел ярым-өч елга җитә, димәк, аны биш ел эчендә бер тапкыр алыштырырга туры киләчәк. Яңа автомобильләр гадәттә җәйге резинада сатыла, димәк кышкы комплектны аерым сатып алырга туры киләчәк - бу 35 мең сум тирәсе, тулы комплект (җәй һәм кыш) якынча 70 мең торачак.
Бензинның бәясе 20 мең чакрымга исәпләгәндә – аена якынча тугыз мең сум. Парковка бәясе дә артып тора. Санап карарга да куркыта.
Икенче яктан, шәхси автомобиль – уңайлылыкның максималь дәрәҗәсе, хәрәкәт иреге һәм бәйсезлек. Шәхси автомобильне берни белән дә алмаштырып булмый торган шартлар барлыгын онытырга ярамый. Мәсәлән, автосәяхәтләр, машинаны акча эшләү чыганагы буларак куллану мөмкинлеге (мәсәлән, такси), һәм башка бик күп нәрсәләр.

Такси һәм каршерингка чыгымнар
Автобелгечләр исәпләве буенча, елына 20 мең чакрым юл үткәндә такси елына якынча 720 мең сумга яки аена 60 мең сумга төшәчәк. 
Каршерингтан куллансаң, ТО, стоянка, запчастьлар турында шулай ук уйларга кирәк түгел. Моның уртача бәясе елына 20 мең км исәбеннән елына 432 мең яки аена 36 мең сумга төшәчәк.

Каршерингта биш ел йөрү вакытында кеше якынча 2,2 миллион сум сарыф итәчәк. Таксида - 3,6 миллион сум, ә шәхси автомобильдә - парковка чыгымнарын исәпкә алганда, 3 миллион сум. 

Шул ук вакытта шәхси машина хуҗаның үзендә калачак. Аны биш елдан якынча миллион сумга сатарга мөмкин. Бу аның чыгымнарын тагын да киметәчәк. Димәк, шәхси автомобильгә ия булу, әгәр сез аны даими кулланасыз икән, отышлырак булып чыга. «Әгәр сез күбесенчә җәмәгать транспортыннан файдаланасыз, ә машинада атнага бер — ике тапкыр йөрсәгез, каршеринг яки такси белән файдалану отышлырак», - дип фикер йөртә белгечләр.
Ни булса да, үз машинаң булуга ни җитә...

Лилия Яфизова