Казан Сабан туена ничек барып була?

Казанда "Дәрвишләр" торак комплексының Каенлык куаклыгында Сабан туе программасы һәм картасы басылып чыкты. Бәйрәм 23 июньдә узачак һәм 9.30 да башланачак, дип хәбәр итә оештыручылар.

Кунакларны татар ишегаллары, «Авыл» уен мәйданчыгы, яшьләр, гаилә Сабан туе, мастер-класслар, «Яңа буын», «Мунча традицияләре», «Фән һәм технологияләр», «Лазертаг», «Болгар радиосы» сәхнәсе, күргәзмә, сәүдә рәтләре һәм башка чаралар көтә. Моннан тыш, Комсомол күлендә «Су Сабантуе» уздырылачак, ул сап-бордларда программа, фотозоналар, җилкән спорты буенча күрсәткеч чыгышлар һәм мастер-классларны үз эченә ала.

Үзәк мәйданда тамашачыларга театральләштерелгән тамаша, Татарстанның һәм Башкортостанның атказанган артисты Ришат Төхвәтуллин, ТРның атказанган артистлары Артур Минһаҗев, Роман Плеханов, Илназ Шәйхразиев, «Зөләйлә» вокаль триосы, «Ворожея» рус җыры театры һәм башкалар катнашында концерт тәкъдим ителәчәк.

Биредә спорт ярышлары һәм уеннар да башланачак. Бәйрәм 15.00 сәгатьтә тәмамлана.

Оештыручылар билгеләп үткәнчә, бәйрәм мәйданчыгына кадәр бушлай шаттллар барачак: Компрессор заводы парковкасыннан (Себер тракты урамы, 40) һәм «МЕГА» сәүдә үзәге парковкасыннан (Җиңү Проспекты, 141). Шулай ук 36, 46, 72 нче рейс автобусларында Халитов урамы тукталышыннан барып җитәргә мөмкин. Алар эш көне графигы буенча 8.00 дән 17.00 гә кадәр йөриячәк.