Кыш бабай белән Санта Клаус нинди бүләк ярата?

Бигрәк тә балалар көтеп ала аны, чөнки бу көнне алар янына күчтәнәчләрен төяп Кыш бабай киләчәк. Ә быел исә Кыш бабай балаларны көттермәскә булды, Лапландиядән үзенең дусты Санта Клаусны чакырып бәйрәм алдыннан балаларга бүләк ясады.

Санта белән очрашуга Казан кирмәне тирәсендә балалар гына түгел, олылар да җыелган иде. Ни дисәң дә, Яңа ел кунагы бит. Өстән җепшек кар явып торса да, Санта белән Кыш бабайның кәефе күтәренке иде, балалар белән рәхәтләнеп аралашты алар. Иң әрсезләре хәтта Сантаның алдына ук менеп утырды, янәсе шулай теләк теләсәң чынга аша икән. Соңыннан кунаклар дусларын җыеп "Кольцо» сәүдә үзәгенә кадәр парад оештырды.

Финнар Кыш бабайны үзләренчә Йоулупукки дип йөртәләр икән. Лапландиядә аның үз авылы да бар. Биредә 600гә якын Эльф балаларга бәйрәм күчтәнәче әзерли икән.

Яңа ел бүләкләрен инде гыйнвар аеннан ук әзерли башлыйбыз. Ел саен аңа бөтен дөньядан миллионга якын хат килә безгә, бөтен балага да бүләк әзерләп бетергәнче бер ел вакыт уза, - ди Санта.
Безнең үзебезнең татар Кыш Бабае Сантадан аермалы буларак якын тирәдә генә, Арча районы, Кырлай авылында яши. Бабайга күчтәнәчләр әзерләргә Шүрәле, Батыр һәм Кар кызы ярдәм итә икән. Ел саен аңа Япониядән алып, Якын Көнчыгышка кадәр 5-8 мең хат килә ди.

Яңа ел кунаклары Татарстанның табигый тарихи музеена да сәяхәт кылды. Биредә аларны "Тин-клуб" яшь журналистлары көтеп тора иде. Алар Бабайлардан үзләре нинди бүләк яратулары белән кызыксынды.

- Мин бүләк алуга караганда бүләк бирергә күбрәк яратам. Балаларның елмаюы, ихлас шатлыгыннан да зуррак бүләк юк минем өчен. Без бер-беребезгә дә бүләк бирергә яратабыз. Мәсәлән, урыс Кыш бабаена мин узган елларда җырлый торган түбәтәй һәм бияләй бүләк иткән идем, - ди Кыш бабай.

Санта да бүләкләр ясарга ярата икән, кайчандыр балаларга агачтан матур курчаклар ясап бирүе истә аның.

Җәй көне Кыш бабайлар ял итә дип уйласагыз, ялгышасыз. Мәсәлән, татар Кыш Бабае җәй дәвамында Нократ бичурасы, Берендей патшасы кебек әкият геройлары оештырган фестивальләргә йөри икән. Урманның чисталыгы да аның өстендә. Ә Финляндия Сантасы үз бакчасында кунаклар кабул итәргә ярата, шулай ук җәй буе балык тота икән.

Кичке яктан Кыш бабай барысын да өй туена чакырды. Бүген "Туган авылым" ресторан комплексында аның яңа ызбасы ачыла икән. Өй туена иң беренчеләрдән булып мөмкинлекләре чикле балалар киләчәк.

Иртәгә баба исә Санта белән Кыш бабай иртәнге унда Анжела Вавилова исемендәге балалар хосписында сабыйларны якынлашып килүче бәйрәм белән котлаячак.