Лаештан үрнәк алырлык

Балалар бакчасына түләүнең бер өлешен кайтара торган өстәмә компенсациягә ата-аналар төрлечә карый. Бер кочак документ җыясы, аннары ул акча артыннан йөрисе була, дип уйлаучылар байтак. Шул ук вакытта рәсми кәгазьләрен тиешле җиргә илтеп бирүчеләр да юк түгел. Әйтик, Лаеш районында ата-аналарның 50 проценты кирәкле документларны тапшырган инде. Лаеш районы башкарма комитетының мәгариф бүлеге җитәкчесе Анатолий Новиковның әйтүенчә, социаль яклау үзәге белгечләре, районның һәр мәктәпкәчә белем бирү учреждениесенә барып, компенсация алу өчен нинди документлар кирәклеге турында сөйләп чыккан. Мондый җыелышларда ата-аналарның 92 проценты катнашкан. А.Новиков белдергәнчә, җыелышта катнаша алмаганнар белән аерым сөйләшүләр алып барылган. Шуннан соң документларны җыю оештырылган.