Кайнар ризыкка гап-гади пенсионерлар да мохтаҗ

Фонд президенты Илһам Исмәгыйлев хәбәр иткәнчә, пандемия чорында эшли башлаган “Тормыш юлы” проекты хәзер дә дәвам итә. “Ярдәм” мәчете территориясендә күп балалы, мөмкинлекләре чикле, аз керемле гаиләләргә һәм мохтаҗ кешеләргә фонд хезмәткәрләре кайнар аш тарата. 

–  Пандемия башлангач, ике ай эчендә ике мең кешегә ланч-бокс тараттык. Үзчикләнү режимы беткәч, инде бу акция тәмамланыр дигән идек. Ризык җыелмасы сорап шалтыратулар күбәйде дә, дәвам итәргә булдык. Мәчет территориясендә социаль бина булдырып, шунда таратабыз. Шул рәвешле вакытлыча булган акция даими эшли торган проектка әверелде, – дип сөйләде ул журналистларга.

Спикерның сөйләвенчә, кайнар ризыкка гап-гади пенсионерлар да мохтаҗ. Укытучы булып эшләп пенсиягә чыккан олы яшьтәге ханым Азинодан кадәр килеп йөри икән. Пенсия акчасы фатир өчен түләүгә һәм дарулар алырга китеп бетә, ашарына җиткерә алмый, якыннары юк. Үзе генә яши, диде фонд президенты. Шулай ук авыр хәлдә калган студентлар да туклана аларда.