Пилотсыз очу аппаратларын күргәндә нишләргә?

Казанда ел башыннан бирле терактлар белән янаган 1007 хәбәр теркәлгән, 2023 елда 2940 шалтырату булган. Хокук саклау органнары хезмәткәрләре әлеге хәбәрләргә шунда ук реакция белдерә. Мәсәлән, ялган шалтыратулар фактлары буенча 2024 елда 158 җинаять эше кузгатылган. Шәһәр террорчылыкка каршы комиссиясе утырышында Россия Эчке эшләр министрлыгының Казан буенча идарәсе башлыгы Надир Закиров шәһәр объектларын саклау буенча өстәмә чаралар күрергә чакырды.

«Әлбәттә, без, һәрвакыттагыча, бердәм фронт белән чыгыш ясаячакбыз. Мондый чакыруларны без әле күрмәдек. Матди һәм психологик яктан әзерләнергә кирәк һәм бу бик мөһим. Тәкъдимнәрне җиткерегез, аларны кулланырга тырышырбыз. Без – шәһәр иминлеген тәэмин итү мәсьәләләрендә сезнең тугры ярдәмчеләрегез», – диде ТР башкаласы мэры Илсур Метшин.

Шәһәр башлыгы массакүләм мәгълүмат чаралары вәкилләренә аерым мөрәҗәгать итте: «Хәзер шәһәр халкының уяулыгы аеруча мөһим, бу гомумдөнья практикасы. Шау-шу тудырмыйча, халыкка мәгълүмат җиткерү формасын табыгыз. Бүген шәһәрлеләрнең уяулыгы башкала иминлеген тәэмин итүдә ярдәм итә торган вакыт».

Надир Закиров сүзләренчә, килеп туган ситуациядә Эчке эшләр министрлыгы хезмәткәрләре террорчылык янауларын ачыклауга юнәлдерелгән чаралар комплексы үткәрә. Төп игътибар мәгариф учреждениеләре, сәүдә үзәкләре, туристлык объектлары һәм оборона-сәнәгать предприятиеләре иминлеген тәэмин итүгә бирелә.

«Террорчылык характерындагы янауларга җавап бирү механизмы, башка ведомстволар һәм органнар белән үзара эш итү тәртибе норматив актлар белән расланган. Патруль экипажларының маршрутлары критик инфраструктура объектларына якынлаштырылган. Транспорт чараларын җентекләп тикшерү үткәрелә», – дип сөйләде Эчке эшләр министрлыгы идарәсе җитәкчесе. Ул билгеләп үткәнчә, эш нәтиҗәләре инде бар. Мәсәлән, 5 нче мартта М-7 трассасында 63 яшьлек ир-ат йөрткән машинаны тикшерү барышында 8 кг артык авырлыктагы гексоген һәм тротил булган цилиндрлар табылган – алар Ерак Көнчыгыштагы күперне шартлату өчен билгеләнгән булган.

Параллель рәвештә шәһәр халкын, шул исәптән диаспора вәкилләрен, хезмәт мигрантларын һәм качакларны диверсия-террорчылык эшчәнлегенә җәлеп итү омтылышларын ачыклау һәм туктату буенча эш оештырылган. «Шәхси состав чит илләрнең махсус хезмәтләре мәнфәгатьләрендә вербовка һәм пропаганда алып баручы затларны ачыклауга юнәлдерелгән», – дип ассызыклады Надир Закиров.

Кызыксынучы ведомстволар һәм дәүләт хакимияте органнары тарафыннан үткәрелгән тактик-махсус дәресләрдә һәм команда-штаб өйрәтүләрендә уртак гамәлләр даими рәвештә алып барыла, дип өстәде ул.

Россия Эчке эшләр министрлыгының Казан буенча идарәсе башлыгы махсус хәрби операция башланганнан бирле полициянең шәхси составы көчәйтелгән режимда эшләвен искәртте. Ул терактларга каршы торуның яңа чакыру булуын, эш итү алгоритмнары эшләнү стадиясендә икәнен ассызыклады. Әмма хәзерге вакытта ук көндәлек инструктажларда вакыйгалар булган урыннарда, шул исәптән пилотсыз аппаратлар яки ракета һәм снарядларның шартламаган өлешләре табылганда, дөрес эш тәртибен башкаруга игътибар бирелә.

Пилотсыз аппаратларны ачыклаган очракта, персонал тарафыннан һәм объектларны саклау буенча вакытында тиешле эш башкарылу зарур. «Мин шәһәр инфраструктурасының мөһим объектлары җитәкчеләренә, объектларның үзенчәлекләрен исәпкә алып, пилотсыз аппаратларны ачыклаганда, эшләрнең төгәл исемлеген билгеләргә, персоналны оптик күзәтү приборлары һәм очу объектларын фиксацияләү чаралары белән тәэмин итү мөмкинлеген карарга киңәш итәр идем», – дип билгеләп үтте Надир Закиров.

Пилотсыз очу аппаратларын күргәндә, мәҗбүри эшләнергә тиешле гамәлләр:
- объект җитәкчесенә яки куркынычсызлык хезмәтенә хәбәр итү;

- хокук саклау органнарына мәгълүмат бирү, мәгълүматны хәбәр итүченең тулы исеме һәм вазифасы, объектның исеме һәм адресы, мәгълүматның беренчел чыганагы һәм аның хәбәр ителү вакыты, үз-үзен тотышы, пилотсыз очкычның ни рәвешле булуы һәм очу юнәлеше турында хәбәр итү;

- объект территориясендә һәм аның янында күзәтү посты кую;

- мөмкин булганча ачык мәйданчыкларда кешеләрнең күпләп җыелуын булдырмау;

- сак һәм үткәрү режимын көчәйтү, территорияне урап узуны оештыру;

- персоналга куркыныч янавы турында хәбәр итү, персоналны ышыклау яки эвакуацияләүне оештыру.

«Коллегалар, мин әлеге мәсьәлә буенча тыгыз хезмәттәшлеккә өметләнәм. Вазгыятьне исәпкә алып, объектларның террорчылыкка каршы саклануын тәэмин итү буенча өстәмә чаралар күрергә кирәк», – дип йомгаклады Россия Эчке эшләр министрлыгының Казан буенча идарәсе башлыгы.

Казан мэриясе сайты