«ШК» сорраштыруы - Тормышта янәшәңдә күңелне җылытырлык якты кешеләр булсын

Хәмид Вәлиди, хезмәт ветераны:

– Һәр елга, һәр эшкә яхшы ниятләрдә керешү хәерле. Игелекле гамәлләр кылыйк, ул үзебезгә игелек булып кайтыр. Хыял илендә яшибез, хыял – югарыга күтәрүче канат. Без – табигать балалары. Табигатьнең чисталыгын саклыйк, агачлар утыртыйк, үсентеләргә сулар сибик. Йорт яныбызга утырткан агачларым мине биеклеккә инде әллә кайчан узып китте. Бүләк көтмим, үзем бүләк бирергә яратам.

Инзилә Хөсәенова, журналист:

– Ирем Илдан белән Казан янәшәсендә өй җиткездек. Шөкер, дивар эшләре бетте, хәзер эчке эшләр башкарыла. Иң мөһиме – җылылык һәм су челтәрләре ясалды, газ кертү эшләре бара. Яңа елны яңа өйдә каршылап булмасмы, дип уйлаган идек, әлбәттә. Ләкин, өлгереп җитмәдек, язларны өебездә каршыларга язсын инде. Җир кишәрлегендә инде бүгеннән үк чәчәкләр, яшелчәләр үстерергә хыялланам.

Гөлназ Рәшитова, радио алып баручысы:

– Сәламәтлек – иң зур байлык. Туганнарыбыз, дусларыбыз исән-сау булсыннар иде. Һәр кешенең тормыштагы планнары үтәлсен яки үтәлә башласын. Башланган эш – беткән эш, диелгән бит. Дөньяда һөнәрләр күп, күңелемә иҗат эшчәнлеге якын. Язучылар, шагыйрьләр, журналистлар яңа әсәрләр тудырсыннар, без әлеге әсәрләрне халыкка радио аша да ирештерербез.

Вакыйф Нуриев, язучы:

– Кыш бик салкын да, бик елак та булмасын иде. Кешене ялыктырып  бик озак та тормасын, үз вакытында китә дә белсен. Кар 1979 елдагы кебек аз да, шулай ук 2023 елдагы кебек чамадан тыш күп тә булмасын. Бураннар юллардагы кешеләрне батырып-туңдырып азапламасын иде. Буран җылы өй тәрәзәсеннән күзәткәндә генә күңелле бит ул. Тормышта янәшәңдә күңелне җылытырлык якты кешеләр булсын.