Татарстан студентларының һәм укучыларының һөнәр осталыгы чемпионаты башлана

— Россияне һөнәрләр буенча халыкара бәйгеләрдән читләштерүдән Ворлдскиллс хәрәкәте үзе күбрәкне югалтты. Россия дистә еллар дәвамында Ворлдскиллс хәрәкәтен пропагандалаучы һәм алга этәрүче көч булды. Казанда узган Ворлдскиллс чемпионатын “һөнәрләр буенча иң яхшы оештырылган халыкара чара”, дип бәяләгәннәр иде,- диде Андрей Поминов.

Россия чемпионаты ике юнәлештән тора: “Профессионалы” һөнәри осталык буенча чемпионат һәм Югары технологияләр чемпионаты.

Татарстан Республикасының “Һөнәр төрләрен үстерү үзәге” генераль директоры Эмиль Гобәйдуллин таныштырганча, Чемпионатның төбәк этабында 1903 кеше катнаша.

— Урта һөнәри белем көллиятләре студентлары, шулай ук 14 яшьтән өлкән мәктәп укучылары үзләренең һөнәри осталыкларын күрсәтә. Мәктәп укучыларына Чемпионатларда катнашуда бернинди чикләү юк,- диде Эмиль Гобәйдуллин.

 — Уку программасында һөнәри белем дәресләре юк, ләкин дәрестән тыш өйрәнү бар. Төрле һөнәр түгәрәкләренә йөргән укучылар чыгыш ясарга мөмкин. Бүген авыл мәктәпләрендә дә компьютер сыйныфлары эшли, укучылар Чемпионатның инновацион технологияләр буенча бәйгеләрендә үзләрен күрсәтә ала,- дип өстәде мәгариф министры урынбасары Андрей Поминов.

Чемпионат бәйгеләре 298 һөнәрне колачлый, быел тагын 56 һөнәр өстәлгән. Мәсәлән: металлар белән эшләү, пилотсыз оча торган аппаратларны ремонтлау, акушерлык эше,универсаль фрезер станокларында эшләү, сөт продукциясе җитештерү, сәнәгать бакчачылыгы.

 — Чемпионатларда авиация өлкәсенә караган һөнәр бәйгеләре турыдан-туры Казандагы авиация заводлары цехларында үткәрелә. Студентлар һәм укучылар бер көнгә “завод эшчесе”  булып ала. Бу бик тәэсирле хис, күпләр киләчәк хезмәт юлын авиация белән бәйли,- диде авиация һөнәрләре буенча эксперт Мария Шубина.

— Һөнәри осталык бәйгеләрендә катнашырга тырышырга кирәк, ул кешедә максатчанлык тәрбияли. Чемпионатның монысында да катнашырга әзерләнәм,- диде Әмир Хәлимбаев.

Ул узган елгы Чемпионатның электр белән эретеп ябыштыру бәйгесе төрендә бронза медаль яулаган.

Татарстанда Чемпионатның төбәк этабы 13 марттан 7 апрельгә кадәр бара. Югары технологияләр буенча чемпионатның финал бәйгесе 10-15 сентябрьләрдә Великий Новгород шәһәрендә булачак. “Профессионалы” һөнәри осталык буенча чемпионатның финалы 27-30 ноябрьләрдә Санкт-Петербургта үткәреләчәк.