Татарстанның тормышы һәм эшләре күпләргә үрнәк

Беренче форум Мурманск өлкәсендә узган.

Бу турыда “Татар-информ” мәгълүмат агентлыгында үткәрелгән матбугат конференциясендә хәбәр ителде. Татарстанның төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин сөйләгәнчә, Россия төбәкләреннән киләчәк 500 федераль, төбәк һәм җирле хакимият органнары вәкилләре, архитекторлар, төзүчеләр шәһәр мохитен формалаштыру, уңайлы тормыш шартлары тудыру буенча фикер алышачак.

Татарстан Республикасы шәһәрләрен үстерү институты директоры Наилә Зиннәтуллина:”Форумда катнашучыларны Татарстан Рәисе Рөстәм Миңнеханов башлангычындагы “Безнең ишегалды” республика программасын гамәлгә ашыру барышы белән дә таныштырачакбыз”, – диде.

 “Татарстан Республикасы муниципаль берәмлекләре советы” ассоциациясе рәисе Әгъзам Гобәйдуллин:”Республикада 400 җәмәгатьчелек мохите, 5 мең ишегалды төзекләндерелде инде. Һәр районның күрсәтерлек эшләре бар. Ләкин, авыллар халкын эш белән тәэмин итү мәсьәләсе җитди бурыч булып тора”, – дип искәртте.

“Шәһри Казан” газетасы хәбәрчесе соравына  Әгъзам Гобәйдуллин:”Авылларда үзара салым проекты гамәлдә, аның ярдәмендә күп эшләр башкарылды. Быел әлеге проектка 1 миллиард 350 миллион сум субсидия каралды. Авыл кешеләре җыешкан акчаның һәр сумына дәүләт 4 сум өсти”, – дип җавап бирде.

Бөтенроссия җирле үзидарәсен үстерү ассоциациясе (ВАРМСУ) рәистәше Ирина Гусева:”Европа, Көнбатыш тәҗрибәсен генә өйрәнү түгел, ә ил эчендәге тәҗрибәне өйрәнү мөһим. Яңа проектларны гамәлгә ашыруда, яңа технологияләрне кулланышка кертүдә Татарстан, әлбәттә, номер беренче”, – диде.