"Иң яраткан җырчыларым – Салават Фәтхетдинов белән Әнвәр Нургалиев..."

Субхон тумышы белән Үзбәкстанның Сәмәрканд өлкәсеннән икән. 2011 елда Казанга килеп, үз бизнесын будырган – җимешләр һәм чикләвекләр сату белән шөгыльләнә.
– Татар телен өйрәнүемнең беренче сәбәбе дә эшем белән бәйле. Сатып алучылар белән аларның үз телләрендә сөйләшәсем килде. Татарча эндәшкәч, сиңа карата кешеләрдә хөрмәт уяна, җылы мөнәсәбәт урнаша. Ике телдә дә кулланыла торган уртак сүзләр күп булганлыктан, телне өйрәнү авыр булмады. Театр-концертларга еш йөрим. Коронавирус аркасында чикләүләр кертелгәч, спектакльләрне, җырлы тамашаларны бик сагынган идем. Татарча китаплар да күп укыйм. Һәр көнне берничә бит булса да укырга тырышам. Хәзерге вакытта Флера Тарханованың шигырьләр китабын укыйм. Бу телдә яхшы сөйләшкәч, әтиең яки әниең татармы дип сорыйлар. Безнең нәселдә татар кешесе юк. Телне ныклап өйрәнүем татарларга булган хөрмәтем ул, – ди әңгәмәдәшем.

Үзбәк һәм татар теле охшаш булса да, кайбер сүзләр Субхонны аптырашта да калдырган. Аларда зәңгәр дип яшел төсне атыйлар икән.

Субхон Татарстанны беренче тапкыр килүендә үк бик ошаткан. Ике ел монда яшәгәч, бер айга Үзбәкстанга кайтып киткән һәм шунда ук Казанны сагына да башлаган.
– Татарстанның кешеләрен дә, табигатен дә, чишмә сулары белән һавасына кадәр яратам. Чынлап гашыйк мин бу республикага. Татарча җырлар тыңларга яратам. Телне яхшылап өйрәнгәч кенә җырның мәгънәсен, моңын аңлый башладым. Иң яраткан җырчыларым – Салават Фәтхетдинов белән Әнвәр Нургалиев. Аларның концертларын калдырмый йөрергә тырышам. Әнвәр Нургалиевнең җырларын яттан беләм дип әйтә алам, аның белән якыннан да таныш без, – ди ул.
Субхон үзе дә җырларга көйләр яза. Зәйнәб Фәрхетдинова белән Зөфәр Билаловның улы АкБулат башкара торган “Китмә” дигән җырның көен ул язган икән. Үзе дә җырлар яздыра.

Татарларның токмачлы ашы белән бәлешен дә бик ярата икән. Токмачлы ашны һәр көнне дә ашый алам, дип елмая үзбәк егете.