Торак йортлардагы «рюмочный»лар бетерелергә мөмкин

Әлеге мәсьәләне сайлау алды кампаниясе чорында халык белән очрашкан вакытта кузгатканнар иде. 5 сентябрьдә Президент Рөстәм Миңнеханов Дәүләт Советына әлеге мәсьәләне хәл итү турында уйларга кушты. Закон проекты Дәүләт Советы сессиясендә 26 ноябрьдә карала башлый. Закон көченә кергәннән соң, ярты ел вакыт узгач, исерткеч эчемлекләр яңа тәртипләр буенча сатыла башлаячак.

Закон проекты беренче чиратта хәзер кафе-бар «битлеге» артына яшеренгән элеккеге рюмочныйларга карата булса да, аның шаукымы торак йортларның беренче катларында урнашкан кафе, рестораннарга да тиде.

- Ресторан һәм кафелар алкоголь белән бары тик 23 сәгатькә кадәр генә сату итә алачак, төнге 11дән иртәнге 10га кадәр аларның моңа хокуклары юк, - диде Дәүләт Советы депутаты Марат Галеев.

Татарстан рестораторлары һәм отельерлары ассоциациясе идарәсе рәисе Зөфәр Гаязов әйтүенчә, закон проекты ресторан һәм кафеларның кеременә бик нык зыян китерәчәк, чөнки аларның төп кереме - алкоголь сатудан.

Сүзен-сүзгә
Татарстан Дәүләт Советы рәисе Фәрит Мөхәммәтшин:
- Торак йортларның беренче катларындагы фатирларны торак булмаган мәйданнарга әйләндерәләр һәм анда «рюмочный»лар ачып, төн уртасына кадәр спиртлы эчемлекләр саталар... Мин моны астыртын алым дип саныйм. Кешене тәмле һәм сәламәт ризык белән сыйлау түгел, ә аракы-шәраб продукциясе сату төп максат итеп куела. Без бу закон проектын хупларбыз дип уйлыйм, ләкин рестораннар һәм лицензияле кафелар эшчәнлегенә зыян салмаска тырышачакбыз. Әмма аларда да исерткеч эчемлекләр сату вакытын катгый күзәтчелектә тотачакбыз.

Татарстанда спиртлы эчемлек тәкъдим итүче 233 ресторан һәм 600гә якын кафе бар.

^{Фото: www.evening-kazan.ru}