Татарстанда дәүләт заказларында ялгышлыклар һәм “кара исемлек”: 500дән артык шикаять теркәлгән

Татарстанда быелның 6 аенда дәүләт сатып алуларында товарларга һәм хезмәт күрсәтүләргә инде 157,85 миллиард сумлык килешүләр кабул ителгән.

– Көндәшлек – дәүләт сатып алуларында бәяләрне киметүнең төп механизмы. Дөрес көндәшлекне, барлык катнашучыларның да тигез хокукларын тәэмин итү әһәмиятле бурыч. Көндәшлек нәтиҗәсендә 2,5 миллиард сумга экономия ясалды. Татарстан предприятиеләренә теләктәшлек күрсәтелә, дәүләт сатып алуларындагы заказларның 80 процентын республика предприятиеләре башкара. Татарстанның сатып алулар буенча дәүләт комитеты сайтына мәгълүматлар урнаштырылган, муниципаль берәмлекләрдә семинарлар да оештырабыз, – диде Татарстанның Сатып алулар буенча дәүләт комитеты рәисе Марат Зыятдинов “Татар-информ” мәгълүмат агентлыгында үткәрелгән матбугат конференциясендә.

Узган ел республикада дәүләт сатып алуларында 171 миллион сумлык ялгышлыклар ачыкланган.

– Бер заказчы, мәсәлән, хезмәт күрсәтелгәне өчен 2 мәртәбә түләү башкарган. Кабат түләнгән акча кире кайтарттырылды. Минзәлә районында урам яктырткычының бәясе 3 мәртәбәгә арттырылган, бәя киметелде. Нурлат районында дәүләт сатып алуларындагы кимчелек, кисәтү ясаганнан соң да, бетерелмәгән иде. Шунлыктан, эш хокук саклау органнарына хәбәр ителде, – диде Татарстан Республикасының Хисап палатасы аудиторы Александр Якупов.

Монополиягә каршы федераль хезмәтнең Татарстан буенча идарәсенә узган ел дәүләт сатып алулары белән бәйле 500 шикаять, ә быел ел башыннан 268 шикаять кергән.

– Быел 1200 сатып алуда 3,5 миллиард сумга төгәлсезлекләр ачыкланды, алар тәртипкә китерелә. Товар җибәрергә яки хезмәт күрсәтергә теләк белдергән кайбер предприятиеләрнең килешүне үтәүдән баш тарткан очраклары да бар. Андый ышанычсыз предприятиеләр “кара исемлеккә” кертелә һәм дәүләт сатып алулары эшчәнлегендә 2 ел дәвамында катнаштырылмый, – дип кисәтте Монополиягә каршы федераль хезмәтнең Татарстан буенча идарәсе җитәкчесе урынбасары Ренат Вәлиәхмәтов.