“Туплар атуы тынып торганда җырлап та алабыз”

Республиканың хезмәт, эш белән тәэмин итү һәм социаль яклау министры Эльмира Зарипова махсус хәрби операциядә катнашкан кешеләргә социаль ташламалар каралганлыгын әйтте. 

– Хәзер дә махсус хәрби операциядәге ир-атларның гаиләләренә, балаларына һәм әти-әниләренә ярдәм күрсәтелә. Яңа туган сабыйга тупланма бүләк ителә. Хәрбиләрнең эш урыннары саклана. Кайткач, башка һөнәргә дә әзерлек курслары уза ала, – диде Эльмира Зарипова.

Татарстан Рәисе Рөстәм Миңнеханов тәкъдимендә махсус хәрби операциядә катнашырга контракт килешүе төзегән кешегә 1,5 миллион сум акча күчерелә. Татарстан Республикасы буенча Эчке эшләр министрлыгының миграция мәсьәләләре буенча идарәсе җитәкчесе Марат Галиев әйткәнчә, чит ил гражданнары да контракт килешүе төзи ала, аларга Россия гражданлыгы бирелә.

Балтач районының Чутай авылы хатын-кызлары бергәләшеп “коры аш” әзерлиләр икән. Алар ризыкны “ТНВ” студиясендә дә әзерләп күрсәтте.

– Саба районына барып, өйрәнеп кайттык та, үзебез дә керештек. Авылыбыз белән хәрбиләр өчен 21 мең 200 кап “коры аш” әзерләп җибәрдек инде, – диде Фәридә Вафина.

Телемарафонның чираттагы кунагы Башкортстанның халык артисты, Татарстанның атказанган артисты Элвин Грей (Радик Юльякшин) булды.

– Махсус хәрби операция зонасына баргалап торабыз, аннан җитдиләнеп кайтасың. Хәрбиләрнең күзләре янып тора, “Без җиңәбез!”, – диләр. Халык армиягә теләктәшлек күрсәтә, моның өчен халыкка да рәхмәт! Яшьләрнең теләктәш булулары аеруча әһәмиятле. Махсус хәрби операциядә катнашучылар белән башкорт һәм татар җырларын җырлашып алабыз. Исән-сау кайтсыннар, җиңү яулап кайтсыннар, – диде Элвин Грей.

Менделеев районы хакимияте башлыгы Радмир Беляев үзләре районында яшәүчеләрнең махсус хәрби операциядә катнашучыларга гуманитар ярдәм туплап җибәреп торулары турында сөйләде. 

Татарстан Фәннәр академиясенең Шиһабетдин Мәрҗани исемендәге институт директоры Радик Салихов республика халкының Бөек Ватан сугышы елларында да фидакарь хезмәт куйганлыгын искә алды. 

– Бүген “Алга”, “Тимер”, “Батыр” батальоннары сугышчылары хәрби бурычларын лаеклы үти. Милләтара дуслыкны саклау кирәк, – диде Радик Салихов.

Махсус хәрби операциядә катнашкан Айрат Сабиров, “Добробат” төркеменең элекке контрактчылары Иван Хомяков, Павел Шишкин, Николай Мусин хәрбиләрнең бердәмлеге турында сөйләделәр.

– Ватанпәрвәрлек белән сугарылган җырлар башкарабыз. Җырларыбызны яздырырга акча җитеп бетми, шунлыктан республика һәм хәйриячеләр ярдәм итсә яхшы булыр иде, – диде “Добробат” төркеме җитәкчесе Иван Хомяков, журналистлар белән әңгәмә корганда.