Ундүрт илдән кунаклар килде

_{Төркия кунагы Якуп Үмәруглы Ирек Миңнәхмәтовка истәлекле бүләк тапшыра.
фото: intertat.ru}

Казанда төрки телле әдәби журналлар форумы ачылды. Чарага ундүрт илдән кунаклар килде.

Алар арасында «Евразия» Язучылар берлеге рәисе Якуп Үмәруглы да бар. Мөхәррирләр барысы өчен дә уртак булган проблемалар турында сөйләшәләр. Шуларның берсе - төрки телле язучыларның әсәрләрен үз журналларында тәрҗемә итеп бастыру.
«Татмедиа» матбугат һәм массакүләм коммуникацияләр республика агентлыгы җитәкчесе Ирек Миңнәхмәтов кунакларга Татарстанда 800 гә якын матбугат чарасы, шул исәптән 32 татарча журнал чыгуы хакында мәгьлүмат җиткерде.
- Республика җитәкчелеге тарафыннан милли басмаларга игътибар бирелә. «Казан утлары, «Безнең мирас» кебек журналлар халкыбызның гореф-гадәтләрен саклау юнәлешендә эшли, - диде ул.
Ирек Миңнәхмәтов кунакларны ноябрьдә узачак «Төреквидение» фестиваленә дә чакырып калды.