Вертолёт төзүчеләргә ипотеканың беренче кертемен түләү өчен 1 миллион 300 мең сумны завод бирә

Юбилей чарасы Авиатөзелеш районының «Крылья Советов» паркында урнашкан Ленин мәдәният йортында узды. Исегездә булса, бу паркны төзекләндерү өчен завод 85 миллион сум акча бүлеп биргән иде. Тиздән мәдәният йорты да яңартылачак.

Заводта 5-6 мең кеше эшләсә, шуларның 35 процентын яшьләр тәшкил итә. Берлеккә 17-35 яшь­лекләр керә. Ләкин 35 яшьтән соң да яшь белгечләр югалып калмый. Карьера үсеше мөмкинлеге яшьләрне тагын да тырышып эшләргә илһамландыра. Заводның яшьләр берлеге советы иҗтимагый оешмасы рәисе Татьяна Колебанова белдергәнчә, иҗатта актив яшьләр станок янында да югары күрсәткечләргә ирешә.

- Яшьләргә төрле яктан ярдәм кулы сузарга тырышабыз. Әйтик, армиядәге егетләргә, декрет ялындагы хатын-кызларга акчалата ярдәм итәбез. Яшьләрнең спорт белән шөгыльләнәселәре килсә, фитнес клубка алган абонемент бәясенең, белгечнең стажына карап, 70-50-30 проценты түләнә. Заводның һәр эшчесе торак хәлләрен яхшырту өчен социаль ипотека һәм «Вертолеты России» холдингы программасыннан файдалана ала. Эшчеләргә ипотеканың беренче кертемен түләү өчен 1 миллион 300 мең сум акча бүленеп бирелә. Бу сумма заводка кире кайтарылмый. Бары тик эшче заводта биш-җиде ел эшләргә тиеш дигән шарт куела, - ди Татьяна Колебанова.

Яшьләр берлеге үзенчә комсомоллар хәрәкәтен алыштырган. Төп максаты - яшьләрне берләштерү, сәнәгатькә җәлеп итү.

Евгений Сороколетов инде өченче ел заводта җайланмаларны төяү буенча белгеч булып эшли.

- Мин һәрвакыт авиация белән кызыксындым. Үземне Казан вертолет заводында сынап карарга булдым. Эшкә урнашу авыр дип әйтмәс идем, барысы да кешенең мөмкинлегеннән тора. Заводның кадрлар сәясәте сәләтле яшь белгечләргә эшкә урнашырга ярдәм итә. Эшемнең нидән гыйбарәт булуын сезгә сөйли алмыйм, чөнки ул хәрби сәнәгать белән бәйле. Эш белән генә түгел, иҗат белән дә яшибез. Заводның яшьләр берлегендә мин рәсем ясыйм. Россиядә дә, чит илләрдә дә инженерлар һәрвакыт югары бәяләнә. Бу - билгеле бер статус. Инженер һәрвакыт үсештә, ни дә булса уйлап таба, - ди яшь белгеч.

Гөлназ Кәбирова исә дүрт ел элек заводта практика узган вакытта эшкә урнашып кала.
- Мин завод хезмәткәрләрен сакчыл җитештерүгә өйрәтәм. Чыгымнарны киметеп, керемне арттыруга юнәлтелгән эш бу. Предприятиедәге процессларны камилләштерүдә кайбер технологияләрне яңартабыз, - ди Гөлназ.

Вертолет заводы - үткәнне онытмыйча, киләчәккә йөз тоткан оешма. Заводның булачак белгечләрен инде мәктәп партасыннан ук үс­терүе моның бер мисалы. Казан­ның 54нче мәктәбендә һәм 8нче гимназиясендә вертолет сыйныфлары эшли. Мәктәп укучыларын вертолет төзү серләренә өйрәтүне заводның генераль директоры Вадим Лигай үз кулына алган.

Валерий Соломахин фотосы