ЧЫК МИҢА КИЯҮГӘ!

Казан егете Айрат Хөсәенов сөйгәне Ләйсән Рәхмәтуллинага тәкъдим ясауның үзенчәлекле ысулын тапкан. «Чык миңа кияүгә!» дигән сүзләрне ул аңа меңләгән футбол фанатлары каршында җиткергән. 8 яшеннән футбол белән мавыккан, хәтта шәһәр командасы өчен профессиональ югарылыкта чыгыш ясаган Айратка, травма алуы нәтиҗәсендә, спорт карьерасы турында онытырга туры килгән. Ә Ләйсән «Спартак» өчен җан ата икән. Төзелеш институтында укыганда танышкан яшьләр инде бер-берләрен 5 ел дәвамында сынаганнар. Ә тәкъдим ясау сәгате менә «Рубин» - «Спартак» матчының тәнәфесендә суккан. Үзәк стадионның зур экраны аша ясалган тәкъдимнән берара югалып калса да, Ләйсән егеткә ризалыгын биргән, билгеле.