Табиблар "Бала үлем хәлендә", диде

Кояшлы яз көннәренең берсендә 2010 елның 30 мартында Баулы районы Исергәп авылында яшәүче Чулпановлар гаиләсендә Самира исемле матур кыз дөньяга килә. Кызчык әкияттәгечә ай үсәсен көн үсеп, тугыз ай дигәндә, тәпи йөреп китә. Тора-бара кайгыга тарырбыз дип башларына да китерми Гөлназ белән Руслан Чулпановлар. Көтмәгәндә 2020 елның сентябрендә Самирага иммун тромбоцитопения (шулай ук бу авыруны тромбоцитопеник пурпура дип тә атыйлар) дигән диагноз куялар. 

— Сайлаулар вакытында мин комиссия әгьзасы идем, сеңлемне балалар белән калдырып киттем, —  дип сөйли Гөлназ апа үзе. — Ә ул Самираның тәнендә барлыкка килгән күгәргән эзләргә игьтибар иткән, кыйналганга да ошамаган. Төсләре дә сары, яшел, кызгылт. Шул вакыттан бирле хастаханә юлын таптый башладык. Күп төрле анализлар бирдек, тромбоцитларның күрсәткече төшеп беткән, җидегә генә калган. Ә сау-сәламәт кешенең ул 400гә якын була икән. Табиблар "Бала үлем хәлендә", диде. Тиз арада республика балалар клиник хастаханәсенә салдылар. Бик озак төгәл диагноз куя алмадылар. Төрле консилиумнар җыелды, килешле дарулар эзли башладык. Әмма дәвалануны өзмәделәр. Тагын бер елдан соң скайп аша Рогачев исемендәге Телемедицина консультациясенә чыгып Самирага иммун тромбоцитопения дигән диагноз куелды. Республика балалар клиник хастаханәсенең гематология һәм иммунология бүлегендә дәваланды. Бала өч ел дәвамында хастаханәдән чыкмады диярлек, керә-чыга, чыга-керә. Алда тулы билгесезлек. Элтромбопаг дигән дару билгеләделәр. Ул бик кыйммәтле. Үз көчебез белән аны Төркиядән, Санкт-Петербургта яшәүчеләр аркылы кайтарта идек. Баланы яшәтер өчен ниләр эшләмәссең. Әмма ул безгә булышмый башлады. Шуннан соң икенче бер препарат - револейд дигәнне билгеләделәр. Аны да чит ил аша кайтартырга, яисә безнең ил җитештерүчеләре аша эзләргә. Бераздан аның тәэсире дә кимеде. Шуннан соң табиблар алга таба дәвалану өчен «Энплейт» препаратын киңәш иттеләр. Үз көчебез белән генә әлеге кыйммәтле даруларны алып бетерә алмыйбыз. Аны Самирага атна саен, һәр дүшәмбе кулланырга кирәк. Бер препаратның бәясе 44мең. Әлеге дару аркасында гына безнең балабыз яши ала. 

Чулпановлар гаиләсе сезнең белән безнең ярдәмгә мохтаҗ. Татарстанлыларга ярдәм кулы сузуларын үтенеп, гомумән, чит кайгыга битараф булмаганнарга мөрәҗәгать итәбез. 
Акчалата ярдәм күрсәтергә теләүчеләр аны  Гөлназ Чулпанова исеменә теркәлгән Ак Барс Банк картасына күчерә ала: 8939 334 56 18.