Татарстанда сайлауларга гаилә белән бару матур гадәткә әверелде. Бүләк тә отарга була

Татарстан Үзәк сайлау комиссиясе рәисе Андрей Кондратьев таныштырганча, сәяси партияләр үзләренең кандидатураларын күрсәтә башлаган. ЛДПР, “Бердәм Россия”, КПРФ һәм “Россия пенсионерларыныд гаделлек өчен” партияләре үз кандидатураларын күрсәткән. Руслан Юсупов (ЛДПР) һәм Рөстәм Миңнеханов Татарстан Рәисе сайлауларына кандидат булулары турындагы документларын республиканың Үзәк сайлау комиссиясенә тапшырганнар инде. КПРФ партиясе Хафиз Миргалимовны, “Россия пенсионерларының гаделлек партиясе” Виталий Смирновны тәкъдим иткән. Татарстан Рәисен сайлауга үз-үзеңне күрсәтү юк, фәкать, сәяси партияләр генә катнаша.

Кремль яр буе урамындагы “Урам” экстрим паркы территориясендә урнашкан “Точка выбора” мәгълүмат үзәгендә үткәрелгән матбугат конференциясе 8 июль – Гаилә, мәхәббәт һәм тугърылык көне рухында узды.
– Татарстанда сайлауларга гаилә белән бару матур гадәткә әверелде. Бу гадәти тавыш бирү генә түгел, ә киләчәктә гаилә белән бергәләшеп сайлауларда катнашуга нигез. Бу гадәтне хуплыйбыз. Яшь идем әле, шулай да бер ветеранның:”Яшьләр, җаваплы булыгыз. Сез иркенләп сайлауларда катнаша алсын өчен 3 сугышны кичтем мин”, – дигән сүзләрен бүгенгедәй хәтерлим. Гаиләләр тату булсын. Әти юк инде, әни исән. Оныгыбыз туды, аннан да зур сөенеч булмастыр, мәгәр, – диде Андрей Кондратьев.

Үзәк сайлау комиссиясе белән ЗАГС идарәсе 7 июльдән “Гаилә белән сайлауга” дигән конкурс игълан итә. Сайлауларга гаилә белән бару турында 1-2 минутлык видеосюжет ясап, Үзәк сайлау комиссиясенең электрон адресына җибәрергә кирәк. Җиңүчеләр август ахырында ачыклана, бүләкләр каралган.
– Татарстан Рәисе Рөстәм Миңнеханов, гомумән, республика җитәкчелеге гаиләләргә һәм күп балалы гаиләләргә, традицион кыйммәтләргә игътибар бирә. Гаилә көне шигарендә республикада тантаналы чаралар бара. Бергә озын гомер кичерүче парлар, махсус хәрби операциядә катнашучыларганың гаиләләре бүләкләнә. Күп балалы 6 гаиләгә автомобиль тапшырыла. Һәр никах, һәр бала туу – гражданлык хәле акты гына түгел, ә бер вакыт кешене сайлау участогына китерәчәк яңа биография. Сайлауларга без һәрвакыт гаилә белән йөрдек һәм йөрибез. Бу үз илеңә һәм республикаңа гражданлык җаваплылыгы күрсәтү бит, – диде Татарстан Республикасы Министрлар Кабинеты каршындагы ЗАГС идарәсе җитәкчесе Эльвира Әхмәтова.

ЗАГС идарәсе дә “Гаилә альбомын карыйбыз” дигән конкурска старт бирде. Җиңүчеләргә акчалата премияләр тапшырылачак.