Бәрәңге уңышы: "Бер адым буразнадан 4,2 килограмм уңыш чыкты. Ике метрга 12 литрлы бер чиләк..."

Чабатаңны иртәрәк ки
Соңгы елларда бәрәңгене халык иртә ала башлады. Август ахырына инде күп кеше казып та бетерә. Быел исә кайберәүләр 6 августта ук алып куйды. Питрәч районының Ленино-Кокушкино авылында яшәүче Римма һәм Михаил Назаровлар бәрәңгене ел да май башында ук утыртып, августның беренче көннәрендә алалар да икән. Быел да шул традициягә тугры калып, август беренче атнасында ук бәрәңге бакчасындагы эшне бетереп куйганнар.   

Иртә торсаң, ит пешә дигәндәй, бәрәңгене иртәрәк чәчкән кешеләрдә аның уңышы чагыштырмача яхшы икән. Питрәч районы Пимәр авылында яшәүче Илсөя Вахитова бәрәңгесен 1 майда ук утырткан булган. Уңышыннан да канәгать. 
– Быел бәрәңгем бик әйбәт. Утырткан вакытта туфракта дым бар иде, баштарак яңгыры да булды бит. Көздән арыш чәчеп калдыруның да нәтиҗәсе бар. Көзен һәм язын бакчаны сукалаттырдым. Тирес тә керттем.  Ә кызыл бәрәңге ел да әйбәт була. Теләсә кайсы җәйдә дә уңышы яхшы чыга, – диде ул. 

Биектау районының Татар Урматы авылыннан Рамил Гыйльманов та, бәрәңгебез узган елгыдан бермә-бер күбрәк чыкты һәм бик эреләр, ди. Моны ул су сибүдән күрә. Әмма алуы гына авыррак булды, җир таш кебек бик каты, көрәк тә керми, ди ул. 

Шәмиевларның да бакчалары бик кантарлы булган. Шулай да сары бәрәңгеләребезның уңышы яхшы булды, ди Тәтеш районының Кече Тархан авылыннан Фәния Шәмиева. 

Минем бакча өчен рекорд!
Буада яшәүче ветеран-агроном, блогер-бакчачы Мөхәррәм абый Мөхәммәтҗанов та бәрәңге уңышыннан канәгать. 
–    Бәрәңгебез бик уңышлы булды. Бигрәк тә Ажур сорты. Бер адым буразнадан 4,2 килограмм уңыш чыкты. Ике метрга 12 литрлы бер чиләк. Бер гектарга күчерсәң, 60 тонна уңыш дияр идем. Сорт өчен дә, минем бакча өчен дә рекорд бу, – дип хәбәр иткән ул социаль челтәрдәге сәхифәсендә. Узган ел бәрәңге аз булгач, бәясе дә күтәрелгәч, иртә язда ук халыкны күпләп икенче икмәк утыртырга чакырган иде. Җәйнең ничек киләсен дә чамалап, бәрәңгене иртәрәк чәчәргә өндәде. 
–    Үземчә кешеләрне эшкә, бакчага өндәдем. Ходай ярдәме, тырышлыгыбыз белән мул уңыш җыелды. Инде хәзер үткән елгы куркулар артта калды, – ди блогер-бакчачы.

Казый гына башлыйбыз әле
Арча районы Наласа авылында яшәүче Рамил Мөхетдинов бәрәңгесен бу ялларда гына казырга уйлап тора. Алар бәрәңгене майның 22се генә чәчкән булганнар. 
–    Без әле сабагын да чапмадык, яшел килеш утырып торалар. Аерым кишәрлеккә утырткан кызыл бәрәңгене казып алдык, тик уңышы әллә ни ис китәрлек дип әйтеп булмый, – ди ул. 

Тәтеш районының Зур Әтрәч авылыннан Мәрзыя апа Юнысова да әле бәрәңге алырга өлгермәгән. Ә менә уңышын, елына караганда ярыйсы булырга тиеш, дип фаразлады. Алар да бәрәңгене соңга калып – 31 майда гына чәчкәннәр икән. Бәрәңгене күп утырмыйлар, бакчаның күп өлешендә азык чөгендере үсә. Өч сыер асрыйбыз, аларга чөгендер күп кирәк, – ди ул. 

Килограммы 15 сумнан
Минзәлә фермеры Нәсим Дәүләтов бәрәңгене 1997 елдан бирле игә. 2010 елгы корылыктан соң ул сугару системасын булдырган. Шуңа ел да яшелчәләре яхшы уңыш бирә. Быел бәрәңгене 210 гектар мәйданга утырткан. 
–    Кибетләр белән эшлибез, яшелчә саклагычым бар. Бәрәңгене халыкка сата да башладык. Аларга килограммын 15 сумнан, кибетләргә 16 сум 50 тиеннән тапшырабыз, – ди ул.

Аныңча, бу алай ук арзан түгел. 5-6 сум булмагач, ярый инде, монысына да шөкер, ди ул.