Шәһри Казан

Үзе дә тегә, башкаларны да өйрәтә

Үзмәшгуль Нәргис яраткан һөнәренә әйләнеп кайтуына шатланып туя алмый

Коронавирустан сакланам дип, бу көннәрдә халык даруханәләргә ябырылды. Ә битлекне хәзер көндез чыра яндырып эзләсәң дә юк. Үзмәшгуль Нәргис Сафронова медицина битлекләре тегеп сата башлаган.

Әмма безнең халык аптырап кала торганнардан түгел, битлекләрне үзләре ясап кия башлады. Интернетта битлек ясауның әллә нинди ысулларын күрергә була хәзер. Гадәттәгечә, ак төстәге генә түгел, кызыклы рәсемнәр төшкәннәрен дә кияләр. Тегүче Нәргис тә битлекләрне иң элек балаларына һәм иренә тегеп куйган. Хәзер сату өчен дә тегә. Инстаграм битендә язылучыларына аны ничек тегәргә икәнлеген дә өйрәтә.

Нәргис, белеме буенча модельер-конструктор булса да, укуын тәмамлауга ук банкка эшкә урнаша.

Реклама

Беренче баласы белән декрет ялында утырганда гына тегү эшенә керешеп китә. Ул биш яшькә кадәрге балаларга күлмәк, пижамалар тегә.

Баштарак шәхси эшмәкәр буларак теркәлгән. Ләкин өйдә генә аз күләмдә эшли торган кеше өчен моның бик үк уңайлы түгеллеген аңлап ала. Шул вакытта үзмәшгульлек турында ишетә.

– Мин моңа сөенүчеләрнең берсе булганмындыр, мөгаен. Шәхси эшмәкәр булганда, салымнарга акча күп китә иде, ә монда аны керемеңә карап кына түлисең. Бөтен эш телефон аша башкарыла. Җайлы һәм мин бик канәгать, – ди ул.

Ике кыз әнисе Нәргис сигез яшеннән үк тегә икән. Мәктәпне тәмамлаганнан соң, укырга кая барырга дигән сорау да тумаган.
– Шушы һөнәремә әйләнеп кайтуыма шатланып туя алмыйм. Яраткан хоббиемны алга таба үстерергә ниятлим. Үземнең сайтымны да булдырдым, ул киләсе айга эшләп китәргә тиеш, – ди.

Нәргис теләге булганнарны тегәргә дә өйрәтә икән. Бу – эшемә ниндидер төрлелек кертә, үзем дә өйрәнәм, башкаларны да өйрәтәм, ди тегүче кыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: