Гөлнара исемен кушарга ярыймы?

Диния нәзарәте исемнәр кушуга кагылышлы китап бастырып чыгарырга ниятли. Китапка керәсе исемнәрнең һәрберсен белгечләр җентекләп тикшерә. Китап әзер диярлек. Берничә бәхәсле  исем буенча билгеле бер карарга киленгәннән соң, аны нәшер итәчәкләр. Сүз уңаеннан мөфти Камил хәзрәт Сәмигуллин халык арасында Гөлнара исеменең мәгънәсен дөрес аңлап бетермәү очраклары турында искә алып, чынлыкта ул фарсы теленнән анар чәчәге, ягъни гранат чәчәге дип тәрҗемә ителә, диде ул журналистлар белән очрашуда. Аның сүзләренчә, гарәпчә "нар" тәмуг дигәнне аңлата һәм шуннан исемне тәмуг гөле дип уйлап ялгышалар.