Ветеринарлар һәм мөфтият корбанлык чалу буенча киңәшләрен бирде

Татарстан Министрлар Кабинеты каршындагы Баш дәүләт ветеринария идарәсе җитәкчесе урынбасары Габделхак Мотыйгуллин әйтүенчә, сарык асрау белән актив шөгыльләнгән төбәкләрдә терлекләр арасында инфекцияле авырулар күзәтелә. Тилчә авыруы илнең утыз өч төбәгендә таралган. Алар арасында Оренбург, Самара, Төмән, Чиләбе, Дагыстан, Ингушетия, Калмыкия, Чечен республикасы һәм башка бик күп төбәкләр бар. Бруцеллез чире егерме дүрт төбәктә, шул исәптән шул ук Оренбург, Дагыстан, Ингушетия, Башкортстан, Пенза, Саратовта теркәлгән. Кайбер төбәкләрдә бу авыруларга каршы вакцина чаралары үткәрелә, шулай булса да, алардан да сарыкларны сатып алырга ярамый.  

– Терлекләрне әлеге төбәкләрдән кертергә теләгән очракта да, “Меркурий” системасы ярдәмендә бу мөмкин булмаячак, – дип сөйләде Габделхак Мотыйгуллин матбугат очрашуында.
Авырулардан имин булган төбәкләрдән керткән очракта да, ул Баш ветеринария идарәсе белән килештерелгән булырга һәм ветеринария документы тутырылырга тиеш. Читтән сарыклар алып кайту турында шәһәр һәм районның ветеринария идарәсенең дә хәбәрдар булуы шарт. Сарыкларга карантин чараларын уздыру мәҗбүри.
Корбан чалу урыннары да ветеринария-санитария таләпләренә туры килергә тиеш. Биологик һәм органик калдыкларны җыеп бару өчен контейнерлар куелу зарур.
Республикада корбан чалу өчен 55 рәсми мәйданчык булдырылачак, шуларның 15е – Казанда. Гает көннәрендә бу мәйданчыкларда ветеринария хезмәткәрләре эшләячәк. Корбанлыкны социаль учреждениеләргә тапшырырга теәүчеләр өчен алар ветеринария-санитария экспертизасын уздырып, документлар тутырачак. Әлеге учреждениеләр ветеринария белешмәләреннән башка итне кабул итми, дип кисәтте спикер.
Сарыкларны алда телгә алынган төбәкләрдән кайтарырга ярамагач, корбан чалырга теләүче бөтен кешегә дә сарыклар җитәрме икән дигән сорауга Габделхак Мотыйгуллин, җитәчәк, дип ышандырды.

Татарстан мөфтиенең беренче урынбасары Рөстәм Вәлиуллин кайда корбан чалыначагы турында мәчетләргә кереп сорашырга кушты. Имам-хатыйблар һәм мәчеттә эшләүчеләр бу турыда хәбәрдар. Корбанлыкка исә заказны алдан ук биреп кую хәерле. Шулай ук гает намазына да иртәрәк торып килергә киңәш итте ул. Роспотребнадзор таләпләре буенча намаз 1,5 метр аралыкны саклап укылачак. Димәк, мәчет эченә күп кеше сыя алмый. Яңгыр була калса, мәчет ишегалдында да укып булмаячак. Кем иртәрәк торып килә, шул мәчеткә эләгә алачак, диде Рөстәм хәзрәт. Мәчеткә бары битлек (яисә респиратор), перчатка, шәхси намазлык белән генә керү сорала. Алар булмаганда, кире борылып кайтырга туры киләчәк.
Гает чаралары иртәнге сәгать 3.30да башланып, 4.30га кадәр дәвам итәчәк. Сәгать 4.30дан корбан чала башларга мөмкин.