Йолдызнамә (21-28 декабрь)

Кучкар (21 март - 20 апрель) 
Сезнең ни дәрәҗәдә үз кыйблагызга тугъры икәнегезне сынар вакыт. Күңелегезнең иң тирән почмагына яшеренгән хыялларыгызны тормышка ашырырга курыкмагыз. Кайвакыт тормышта бер генә шанс бирелә – файдаланып калыгыз!

Үгезбозау (21 апрель - 20 май)
Шәхси мөнәсәбәтләрдә ашыгыч нәтиҗәләр ясамагыз. Тынычланыгыз һәм барысы да үз-үзеннән җайланыр. Соңгы тапкыр кайчан китап укыдыгыз яки бер сәбәпсез урам әйләндегез? Күңелегезгә ошаган нәрсәләр белән генә шөгыльләнеп карагыз әле.

Игезәкләр (21 май - 21 июнь) 
Килеп туган вәзгыятьне анализлагыз һәм нәрсәне дөрес эшләмәгәнегезне ачыклагыз. Барысын да төзәтергә вакытыгыз бар әле. Юлларда сак йөрергә тырышыгыз.

Кысла (22 июнь - 22 июль) 
Шау-шулы урыннарда, компанияләрдә булырга тырышмагыз. Тынычлыкта калу сезнең иҗади потенциалыгызны ачарга ярдәм итәр. Ышанычлы кеше белән идеяләрегезне уртаклашуның уртак бизнеска китерү ихтималы зур.

Арыслан (23 июль - 23 август) 
Якыннарыгыз өчен мактау сүзләрен кызганмагыз. Алар сезнең җылы сүзегезгә, игътибарыгызга мохтаҗ. Кайчак гаилә белән бергәләшеп берәр фильм карау да берләштерә. Атна ахырында озын сәфәр көтелә.

Кыз 24 август - 23 сентябрь 
Документлар белән эшләгәндә, хата җибәрә күрмәгез - бу сезне аңлашылмаучылыктан коткарачак. Гомумән, бу атнада Кызларга игътибарлырак булырга киңәш ителә. Бигрәк тә акча белән бәйле мәсьәләләрдә.

Үлчәү (24 сентябрь - 23 октябрь)
Чыгымнарыгызны планлаштырырга өйрәнегез. Кирәкмәгән әйберләр сатып алу гадәтегезне берәр айга онытып торсагыз да була. Акчагызны җыеп бара башлагыз әле, шунда ук кесәгез калыная башлаганны сизәрсез.

Чаян (24 октябрь - 22 ноябрь) 
Йолдызлар бүгенге көн белән генә яшәмәскә киңәш итә. Максатыгызга ирешү өчен актив гамәлләргә күчегез. Уңышсызлыкларга борыныгызны төшермәгез, киресенчә, максатыгызга ирешүнең башка юлларын эзләгез.

Укчы (23 ноябрь - 21 декабрь) 
Тулысынча эчке тоемлавыгызга таяныгыз, ул сезне һәрвакыттагыча алдамас. Очраклы очрашуның язмышыгызда мөһим роль уйнавы бар. Бәхет, бер елмайса, гел елмая – авызыгызны ачып йөрмәгез.

Кәҗәмөгез (22 декабрь - 20 январь) 
Әгәр берәр эшегез план буенча бармаса, борчылмагыз. Сез барысына да уңышлы башкарып чыгарсыз. Исерткеч эчемлекләр белән мавыкмаска тырышыгыз, машина йөртү таныклыгыннан колак кага күрмәгез.

Сукояр (21 январь - 18 февраль) 
Бөтен кешегә ярарга тырышмагыз. Беренче чиратта үз мәнфәгатьләрегезне кайгыртсагыз начар булмас иде. Ниһаять, бурычлы кеше сезгә әҗәтен кайтарып бирер. Шуңа саллы гына премия дә өстәлер төсле.

Балык (19 февраль - 20 март) 
Хәзер сезнең көч һәм энергиягез ташып тора, шуңа күрә иң катлаулы эшләргә дә кыю алына аласыз. Көтмәгән, уйламаган җирдән зур суммада акча кереп сөендерер.