"Беркайчан да олы юлга ат белән чыкмый иде. Үлеме йөрткәндер"

10 июньдә, 16.30 сәгатьтә Татарстанның Тукай районы Яңа бистәсендә коточкыч фаҗига килеп чыккан. 17 яшьлек Дарья ат белән йөреп керергә чыгып китә, атка колыны да иярә.

Кыз авылга кайткан саен яраткан атына атланып авыл урамнарын әйләнеп керергә яраткан. Ни өчендер, бу юлы Дарьяның аты олы юлга килеп чыккан. Нәкъ шул вакытта трассада КамАЗ  пәйда була. Колын куркып, юлдан читкә таба йөгерә, моны күргән ат та тае артыннан ыргыла. Дарья ат өстеннән юлга егылып төшә һәм йөк машинасы тәгәрмәче астында калып һәлак була.

Без Әҗмәкәй авыл җирлегенә шалтыратып, әлеге фаҗига һәм һәлак булган кыз турында сораштык. Даша Тукай районы Яңа бистәсендә яшәгән. Минзәлә авыл хуҗалыгы техникумының беренче курсын тәмамлаган, биредә кондитерлык белгечлеген үзләштергән. Кызны бистәдә белмәгән кеше юк икән. Һәркем белән елмаеп исәнләшә торган була. Авыл балаларын ишәк өстенә утыртып авыл урамнарын әйләндерергә яраткан. 
Кыз тәрбиягә алынган бала. 6 яшендә яңа гаиләдә яши башлый. Сабый чагыннан ук ачлык-ялангачлыкны күрергә туры килгән аңа. Әнисе биш айлык баланы берүзен калдырып чыгып киткән булган, баланың ачыргаланып елаганын ишетеп, кешеләр полиция чакырткан. Шуңа сәламәтлеге, үсеше буенча да тоткарлыклар була кызның. Яңа әти-әнисе Дашаны төрле табибларга, ял йортларына йөртә. Кыз ачылып китә, әмма аралашу буенча катлаулыклар кала. Әнисе кызга терапия буларак, бик күп җәнлекләр асрый башлый. Дарья көне-төне шулар белән әвәрә килә: этләр, мәчеләр, ишәк...һәм атлар. Аларны бигрәк тә ярата кыз. Атны иярләп, авыл тирәсен әйләнеп кайтырга, озаклап йөрергә ярата. 
Гадәттә, Даша олы юлга чыкмыйча, кыр-басуларны гизеп йөргән. Күрәсең, бу юлы колын белән нидер булгандыр, дигән фикердә Дашаның гаиләсе. КамАЗ руле артында Яңа Сарайлы авылы кешесе булган, ул да әлеге хәлдән шок хәлендә. "Ат көтмәгәндә пәйда булды. Ничә тонналы машинаны туктатып өлгерә алмадым", дигән ул хокук сакчыларына. 

Бу факт буенча тикшерү үткәрелә, вакыйганың нечкәлекләре һәм шартлары ачыклана. Нәтиҗәдә процессуаль карар кабул ителәчәк.  
Дашаны 13 июньдә Яңа бистәсе зиратында җирләячәкләр.