«Ул минем гаиләмне куркытып торды»: танылган остеопатны үтерүчене кулга алганнар

Аның үле гәүдәсен Казанның Коммунаров урамындагы йортларның берсендә табып алганнар. 

Кеше үтерүдә гаепләнүче Тимур Әхмәтҗанов суд залында башта комментарий бирүдән баш тарткан, ләкин тиз арада фикерен үзгәрткән. Йөзен камералардан яшерми, тыныч кына сөйли һәм тирә-юньдәге вакыйгалар турында аек фикер йөртә.
29 май иртәсе Әхмәтҗанов өчен сеңлесенең ире белән бәхәсләшүдән башланган. Гаилә һәм башка мәсьәләләр буенча карашлары туры килмәгәнгә еш кына ирләр бәхәскә кергән. Һәрберсе үз фикерендә калган һәм аларның берсе дә оппонентының карашын кабул итәргә теләмәгән.

— Ул кеше апамны гына түгел, бөтен гаиләмне куркытып торды. Мөмкинлек чыккан саен һәркемне мыскыл итте. Бу хакта аның белән күп тапкырлар сөйләшергә тырыштым, ләкин уртак фикергә килә алмадык. Шуннан соң шундый адымга барырга булдым, куркытырга гына теләгән идем. Әмма аны үтерү яки имгәтү турында уйламадым. Шулай килеп чыкты инде, - диде Тимур судья каршында.

Ир - ат фаҗигагә кадәр ничек яшәгәүләре турында сөйләр өчен озак вакыт дәшми торды. 

— Мин үз гаебемне тулысынча таныйм һәм тәүбә итәм. Ләкин ул явыз, сеңлемне даими рәвештә кыйнап торды, яулык кияргә мәҗбүр итте, аның аңын тулысынча контрольгә алды. Сеңлем гаиләсеннән һәм улыннан баш тартты, бу безнең барыбызга да бик нык тәэсир итте. Без хәзер элеккечә якын аралашмыйбыз, менә шул кеше безне әлеге дәрәҗәгә җиткерде. Рәсүл радикаль карашлы кеше иде. Үзен дини итеп күрсәтергә теләде. Әмма шул вакытта эчә, тәмәке тарта, массажчы, остеопат булып эшләгәч, башка хатыннарга кагыла иде. Минем өчен бу гадәти хәл түгел, – дип белдерде үтерүдә гаепләнүче.

Әхмәтҗанов фаҗигагә кадәр бер көн кала туган көнен бәйрәм иткән. Бәлкем, спиртлы эчемлекләр куллану да фаҗиганең тагын бер сәбәбе булгандыр. 

"Үтерүдә Тимур Әхмәтҗанов гаепләнә, үзенең сүзләре һәм башка дәлилләр белән аның гаебе расланды. Аеруча авыр җинаятьтә гаепләнүен исәпкә алып, Әхмәтҗановка ике айга сак астына алу рәвешендә сак чарасы билгеләргә тәкъдим итәм, – диде Тикшерү Комитетының аеруча мөһим эшләр буенча тикшерүчесе Максим Коробкин.

Судья Әхмәтҗановны ике айга СИЗОга җибәрергә карар итте. 

Сүз уңаеннан, һәлак булган Рәсүл Буранов Казанда сколиозны операциясез дәвалаучы, Кытай халык медицинасы белән шөгыльләнүче остеопат, 15 ел эш тәҗрибәсе булган медик булган.

Рәсүл Буранов татар эстрадасы җырчылары белән аралашып яшәгән. Аларның туган көннәренә, концертларына йөргән.

«Ничек тыныч кына яшәргә соң, шундый хәбәрләр килеп торганда… Урының оҗмахта булсын, Рәсүл», – дип язган җырчы Зәринә Хәсәншина.